Hunerich
From Wikipedia
Hunerich (* üm 430?; † 484) weer de Söhn vun Geiserich un vun 477 bit 484 König vun de Wandalen.
Nümms kann genau seggen, wannehr Hunerich baren is, man dat warrt vertellt, dat weer vör den Övergang vun de Wandalen vun Spanien nah Afrika in dat Jahr 429. Vun dat Jahr 442 af an weer he mit Prinzess Eudokia verlööft. Dat weer den röömschen Kaiser Valerian III. sien Dochter. Vördem weer Hunerich mit Theoderich I. sien Dochter verlööft oder ok verheiraat. Dat weet een nich so genau. Theoderich weer de König vun de Westgoten. Hunerich sien Vadder Geiserich hett düt Verlööfnis uplööst. He meen, Theoderich sien Dochter harr versöcht, em mit Gift an de Siet to bringen. Dorüm hett he de Deern ok wat andoon, ehr he ehr torüchschicken dö. Dat warrt aber ok seggt, Geiserich hett dat Verlööfnis uplööst, weil he en beter Partie för sien Söhn hebben woll un versöch, den Kaiser sien Verwandschup mit sien eegen Familie to verbinnen.
As he jung weer, leef Hunerich as een Börg an Valentinian sien Hoff. As Rom denn nah den Kaiser sien Dood in dat Jahr 455 vun de Wandalen utplünnert wurrn is, nehm Geiserich de Wittfro vun den Kaiser un ehr beiden Dochters Eudokia un Placida mit nah Afrika. De Wittfro heet Licinia Eudoxia un dat warrt seggt, se harr de Wandalen ropen, weil se ehr Fienden den Dood vun ehren Mann torüchbetahlen wull. Ehr Dochter Eudokia wurr mit Hunerich verspraken, as se dree Jahr oolt weer. 455 oder 456 hefft de beiden denn heiraat. De beiden hefft enen Söhn harrt, den sien Naam weer Hilderich. He weer König vun de Wandalen vun 523 bit 530. Baren is he um un bi 455 oder ok 460, sturven is he 533. Later güng Eudokia nah Jerusalem. Dat warrt seggt, se neih ut vör ehr ariaanschen Mann. Üm un bi 466 is se dor sturven.
Hunerich is in dat Jahr 477 König vun de Wandalen wurrn. He folg dorbi sienen Vadder Geiserich up. In de Jahren 483 un 484 is he achter de Kathoolschen in sien Riek her ween un hett sik dor een Naamen mit maakt. Vele Bischöp mössen in de Tiet dat Riek verlaten. An’n 23. Dezember 484 is he sturven.
