Akronym
From Wikipedia
En Akronym (greeksch ακρωνύμιο, vun άκρος, ákros - de Topp, de Rand un όνυμος, ónymos - de Naam) is en Afkörten, de as egen Woort utspraken warrt, bi de de Bookstaven also nich enkelt spraken warrt. Bispelen sünd NATO för North Atlantic Treaty Organization (Organisatschoon vun den Noordatlantikverdrag) oder de DAX för Deutscher Aktienindex (Düütsch Aktienindex).
En Sünnerfoorm is dat Apronym, wat en Akronym is, dat en Woort billt, dat al existeert (to'n Bispeel de elektroonsche Stüerverkloren ELSTER (Elektronische Steuererklärung), wobi Elster ok dat hoochdüütsche Woort för Heckster is). De Schrievwies vun Akronymen besteiht mehrst ut en Reeg vun Grootbookstaven, de de Anfangsbookstaven vun de Bestanddelen betekent, ut de sik dat Akronym tosamensett. In en poor Fäll hett sik mit de Tied ok en lüttschrevene Schrievwies rutbillt, de de vun normale Wöör gliekt (to'n Bispeel Radar oder Aids). Wiels Akronymen (anners as de mehrsten Afkörten) ahn afsluten Punkt schreven warrt, is in disse Fäll nich to erkennen, dat dat Kunstwöör sünd.
