Anton Buttiġieġ
Minn Wikipedija, l-enċiklopedija ħielsa.
Anton Buttiġieġ, (Qala, Għawdex, 19 ta’ Frar 1912), Avukat, Politiku, Poeta u t-tieni president ta' Malta.
Buttiġieġ kien it-tielet tarbija ta’ Salvatore u Concetta(mwielda Falzon). Beda l-edukazzjoni tiegħu fl-iskola Primarja tal-Qala (1916 - 1922), fis-Seminarju ta’ Għawdex (1923 - 1927). Issokta bl-edukazzjoni tiegħu fl-iskola ta’ San Alwiġi, f’Malta (1928 - 1930) u l-Universita’ ta' Malta. Ha il-lawrja (BA fil-Leteratura) fl-1934 u Dottorat fil-Liġi fl-1940.
Ta’ tnejn u tletin sena iżżeweġ l-ewwel mara tiegħu, Carmen (mwielda Bezzina) u kellhom tlett itfal, John (Dr. J. Buttigieg B.A., LL.D., M.P) - Rose (miżżewġa lil Dr. J. Brincat, B.A. (Lond.), B.Sc. (Econ.) (Lond.), LL.D., M.P.) u Emanuel Buttigieg LL.D., avukat).
Wara l-mewt ta' l-ewwel mara, Anton Buttiġieġ iżżewweġ lil Connie Scicluna fl-1953, li hi wkoll ma kellhiex ħajja twila. Ta’ tlieta u sittin sena Anton Buttiġieġ iżżewweg mill-ġdid lil Margery Patterson. Iz-żewġ imwiet li kien għadda minnhom influwenzaw il-poeżija tiegħu.
Fit-Tieni Gwerra Dinjija serva bħala spettur tal-pulizija (1942 - 1944) u aktar tard studja l-liġi. Għamel xi żmien bħala maġistrat fil-Qorti ta’ Malta u mill-1946 sa l-1948 kiteb għat-"Times of Malta" u kien Editur ta' "The Voice of Malta" (Gazzetta Laburista) mill-1959 sa l-1970.
Il-ħidma politika kienet ukoll parti integrali fil-ħajja ta’ Anton Buttiġieġ. Ġie elett għall-ewwel darba fil-Parlament 1955. Filwaqt li okkupa diversi karigi, fosthom President tal-Partit Laburista, Deputat Mexxej ta’ l-istess Partit, Ministru tal-Ġustizzja u Deputat Prim Ministru, laħaq il-qofol tal-karriera politika tiegħu fl-1976 meta inħatar it-tieni President ta’ Malta Repubblika.
Il-letteratura kienet importanti ferm fil-ħajja ta’ Anton Buttiġieġ. Kien wieħed mill-fundaturi tas-soċjetà għall-lingwa Maltija. Aktar tard kien ukoll membru ta’ l-Akkademja tal-Malti.
Anton Buttiġieġ miet fl-età ta’ wieħed u sebgħin sena, fl-1983.
Werrej |
[editja] Premjijiet
- Fl-1971 rebaħ il-premju għall-poeżija, imniedi mill-Gvern ta' Malta.
- Fl-1972 rebaħ il-premju Ġużè Muscat Azzopardi għall-poeżija.
- Fl-1975 iċ-Circolo Culturale Rhegium Julii ta' Reggio Calabria ippremjah bi plakka tal-fidda għall-poeżiji tiegħu.
- Fl-1977 rebaħ il-premju International Prize of Mediterranean Culture għall-poeżija mogħti miċ-"Centro di Cultura Mediterranea" ta' Palermo.
- Fl-1979 ingħata First Prize and a Special Diploma for Poetry in the First Category miċ-Centro Culturale Artistico Letterario - Citta' di Brindisi.
- Fl-1979 rebaħ premju "Malta Literary Award" għall-ewwel volum ta' l-awtobijografija tiegħu Toni tal-Bahri.
[editja] Pubblikazzjonijiet
[editja] Poeżija Lirika
- "Mill-Gallarija ta' Żgħożiti". - 1949
- "Fanali bil-Lejl". - 1949
- "Fl-Arena". - 1970
- "Ballati Maltin". - 1973
- "Il Mare di Malta". - selezzjoni ta' poeżiji maqluba għat-Taljan - 1974
- "Il-Għanja tas-Sittin". - 1975
- "The Lamplighter". - selezzjoni ta' poeżiji maqluba għall-Ingliż - 1977
- "Qabs el Mosbah". - selezzjoni ta' poeżiji maqluba għall-Għarbi - 1978
- "Poeziji Miġbura - L-ewwel Volum" - L-ewwel żewġ kotba.
- "From the Balcony of my Youth" u "Lamps in the Night" ġew mitbugħa f'volum wieħed bit-titlu ta' "Collected Poems" - 1978.
[editja] Poeżija Umoristika
- "Ejjew nidħku ftit" - 1963
- "Ejjew nidħku ftit iehor" - 1966
[editja] Ħajki u Tanki
- "Il-Muża bil-Kimono" - 1968.
