അഞ്ചുതെങ്ങ്
വിക്കിപീഡിയ, ഒരു സ്വതന്ത്ര വിജ്ഞാനകോശം.
കേരളത്തിലെ തിരുവനന്തപുരം ജില്ലയിലെ ഒരു തീരദേശ പ്രദേശമാണ് അഞ്ചുതെങ്ങ്. വര്‍ക്കലയില്‍ നിന്നും 12 കിലോമീറ്റര്‍ മാറിയാണ് അഞ്ചുതെങ്ങ് സ്ഥിതിചെയ്യുന്നത്.
ബ്രിട്ടീഷ് സാമ്രാ‍ജ്യ വാഴ്ചയുടെയും ഗ്രാമീണജീവിതത്തിന്റെയും ഒരു സംയോജനമാണ് അഞ്ചുതെങ്ങ്. കടലിന്റെയും കായലിന്റെയും സൌന്ദര്യം അഞ്ചുതെങ്ങില്‍ പ്രതിഭലിക്കുന്നു. ഇന്നും കട്ടമരങ്ങളില്‍ മത്സ്യബന്ധനത്തിനുപോകുന്ന മുക്കുവരെ അഞ്ചുതെങ്ങില്‍ കാണാം.
വെളുപ്പും ചുവപ്പും നിറങ്ങള്‍ ഇടകലര്‍ന്ന അഞ്ചുതെങ്ങ് ലൈറ്റ്‌ഹൌസ് ജനങ്ങള്‍ക്കായി തുറന്നുകൊടുത്തിരിക്കുന്നു. 199 പടികള്‍ കയറിയാല്‍ ലൈറ്റ്‌ഹൌസിന്റെ മുകളില്‍ നിന്ന് അഞ്ചുതെങ്ങ് തടാകവും കടല്‍പ്പുറവും കാണാം.
അഞ്ചുതെങ്ങിലെ പൊഴിയില്‍ കടലും കായലും സമ്മേളിക്കുന്നു. ഫുട്ബോള്‍ ആണ് അഞ്ചുതെങ്ങിലെ പ്രധാന വിനോദം.
ബ്രിട്ടീഷ് ഈസ്റ്റ് ഇന്ത്യാ കമ്പനി നിര്‍മ്മിച്ച അഞ്ചുതെങ്ങ് കോട്ട പ്രശസ്തമായ ഒരു ചരിത്രസ്മാരകമാണ്. തിരുവിതാംകൂര്‍ നാട്ടുരാജ്യത്തിലെ ആദ്യത്തെ ബ്രിട്ടീഷ് സൈനീക കേന്ദ്രമായിരുന്നു അഞ്ചുതെങ്ങ് കോട്ട. 1813 വരെ ബ്രിട്ടീഷ് ആയുധ-പണ്ടികശാല അഞ്ചുതെങ്ങ് കോട്ടയില്‍ ഉണ്ടായിരുന്നു. കോട്ടയിലെ കാഴ്ചഗോപുരവും തുരങ്കവും ഇന്നും സംരക്ഷിച്ചിരിക്കുന്നു. ചതുരാകൃതിയില്‍ ഉള്ള കോട്ടയില്‍ ഒരു അര്‍ദ്ധവൃത്താകൃതിയിലുള്ള തുരങ്കം കിഴക്കുവശത്തായി ഉണ്ട്. ഇത് കടലിലേക്കുള്ള ഒരു രഹസ്യ പാതയായി കരുതപ്പെടുന്നു. ഒരു പുരാതനമായ പള്ളിയും അഞ്ചുതെങ്ങില്‍ ഉണ്ട്.
ബ്രിട്ടീഷ് ഭരണകാലത്ത് അഞ്ജെങ്കോ എന്നായിരുന്നു അഞ്ചുതെങ്ങ് അറിയപ്പെട്ടിരുന്നത്. മാമ്പള്ളി പള്ളിയും അഞ്ചുതെങ്ങ് പള്ളിയും വളരെ സുന്ദരമാണ്. പല ബ്രിട്ടീഷുകാരും ഇവിടെ അടക്കം ചെയ്യപ്പെട്ടിരുന്നു. അവരുടെ ശവകുടീരങ്ങള്‍ ഇന്നും ഇന്ത്യയിലെ സാമ്രാജ്യവാഴ്ചയ്ക്കുള്ള ചരിത്രസ്മാരകങ്ങളായി നിലനില്‍ക്കുന്നു. ബ്രിട്ടീഷ് ചരിത്രകാരനായ റോബര്‍ട്ട് ഓം ഇവിടെയാണ് ജനിച്ചത്.
ക്രിസ്തുമസ് സമയത്തുനടക്കുന്ന പള്ളി പെരുന്നാള്‍ പ്രശസ്തമാണ്. കയര്‍ വ്യവസായത്തിനും അഞ്ചുതെങ്ങ് പ്രശസ്തമായിരുന്നു.
[തിരുത്തുക] എത്തിച്ചേരുന്ന വിധം
- തിരുവനന്തപുരത്തുനിന്നും 34 കിലോമീറ്റര്‍ അകലെയാണ് അഞ്ചുതെങ്ങ്.
- ചിറയിന്‍കീഴ്‌ റെയില്‍‌വേ സ്റ്റേഷനില്‍ നിന്നും 6 കിലോമീറ്റര്‍ ദൂരമാണ് അഞ്ചുതെങ്ങിലേക്ക്. വര്‍ക്കല റെയില്‍‌വേ സ്റ്റേഷനില്‍ നിന്നും 8 കിലോമീറ്റര്‍ ദൂരമാണുള്ളത്.
[തിരുത്തുക] മറ്റു വിവരങ്ങള്‍
ലൈറ്റ്‌ഹൌസ് 3മണി മുതല്‍ 5 മണിവരെ ദിവസവും തുറന്നിരിക്കുന്നു. ലൈറ്റ്‌ഹൌസില്‍ പ്രവേശിക്കാന്‍ ഒരു ചെറിയ പ്രവേശന ഫീസ് ഉണ്ട്. കോട്ട 5 മണിക്ക് അടയ്ക്കുന്നു.
 |
കേരളത്തിലെ സ്ഥലങ്ങളുമായി ബന്ധപ്പെട്ടുള്ള ഈ ലേഖനം അപൂര്‍ണ്ണമാണ്‌. ഇതു പൂര്‍ത്തിയാക്കാന്‍ സഹായിക്കുക. |
