Joep Nicolas

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.

Josephus Antonius Hubertus Franciscus (Joep) Nicolas (Remung, 6 oktober 1897 - Sjteil, 25 juli 1972) waor 'ne Nederlandse glazeneer, sjilder en teikenaer. Hae weurt besjouwd es 'ne vernujer in de glaassjilderkuns in de 20e ièw. Hae huèrde bie 'n bekènde generatie Limburgse kunstenaersj, woa ouch o.m. Charles Eyck, Henri Jonas, Harry Koolen, Edmond Bellefroid, Han Jelinger, Hub Levigne, Jos Postmes, Jef Scheffers bie huèrde.

[bewirk] Biografie

Nicolas woort gebore in de Lindanussjtraot in Remung. 't Vak van glazeneer lièrde hae in 't atelier van ziene pap Charles Nicolas, dat in 1855 gesjtiech waor door ziene opa Frans Nicolas. Ein van zien ièrsjte opdrachte waore moersjilderinge en twiè gebrandsjilderde vènstere veur de kèrk van Asselt (gemeinte Zjwame) in 1922. In 1924 trouwde hae mèt de Belzje beeldhouwster Suzanne Nys; 't paar góng in Groet (Noord-Holland) wone, woa twiè dochtersj gebore woorte. Mèt zien Sint-Maartensvènster wón hae in 1925 'ne belangrieke pries op de Exposition internationale des Arts décoratifs et industriels modernes in Paries.

Daonao kaome väöl opdrachte binne, veural veur religieus glaas-in-loadvènstere en veur vènstere in openbaar geboewe. In 1933 kièrde Nicolas mèt zien gezin vanoet Groet truuk nao Remung. Aan 't ing van de jaore daartig óntworp hae 'n paar vaze veur de glaasfabriek van Leerdam en lag hae ziech ouch get miè toe op 't sjildere. Van 1939 bies 1958 woonde Nicolas in de Vereinigde Sjtate, woa hae veur 22 kèrke vènstere maakde.

Wie Nicolas truukkaom in Nederland vestigde hae ziech mèt Suzanne in Sjteil. In 1955 houw hae de opdrach gekrege um de vènstere veur de Ouw Kèrk in Delf te make, woa-aan hae vanaaf 1958 begoes te wèrke. Dees vènstere ('t lètste woort geplaats in 1972) zint zien bekèndste werk.

In de jaore zestig kreeg Nicolas neet väöl opdrachte miè en woort zien werk, en de glaassjilderkuns in 't algemein, minder gewaardeerd. In 1972 sjtorf Nicolas. Hae woort begrave op 't kèrkh'f neve de basiliek van Sint-Odiliënberg, woaveur hae de vènstere houw óntworpe.

[bewirk] Werk

't Werk van Joep Nicolas ies expressief, expressionistisch en kleurriek. De christelike symboliek sjpeelt 'n groate rol. Hae besjouwde 't load neet allein es functioneel, meh ouch es ónderdeil van de compositie; zoa trok hae de loadliene sóms dweersj door persone heen. Sómmige van zien werke zint abstrak. In Amerika woort zien werk zakeliker en minder romantisch.

Nicolas bedach ouch inkel technische vernujinge in de glaassjilderkuns, woa-ónder 't vermurail (glaasmoersjildering) en 't gebruuk van opaline (dun mèlkglaas).

Werke van Nicolas bevinge ziech ónder andere in:

de Ouw Kèrk in Delf
de Pancratiusbasiliek in Tubbergen (gebrandsjilderd glaas van vief generaties Nicolas; de kruusweeg ies gebeeldhouwd door Suzanne Nicolas-Nys)
kèrk van Sint-Dionysius de Areopagiet in Asselt
kèrk van Slevevrouw van de Zeve Sjmarte in De Meulenhoek
de Sint Hubertuskèrk in Groat Genhout
de Sint-Christoffelkathedraal van Remung
't sjtadhoes van Remung
de basiliek van Sint-Odiliënberg
de abdij van Orval (Belsj)
't sjtadhoes van Breda
de kèrk van Sjpawbik