Jan Notten
Van Wikipedia
- Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.
Jan G.M. Notten (Heerle, 2 januari 1935 - Valkeberg, 26 juni 2005) haet in zien leve väöl gepresteerd op ’t gebied van ’t dialek, de volkscultuur en historie in Limburg en in Valkeberg aan de Geul. Van zien vak waor hae Neerlandicus en lièraar Nederlands. Daoneve waor hae ónderzeuker en sjriever euver dialek-taalkundige en historische ónderwerpe. Publicaties in de vorm van brochures, artikele, carnavals-proclamaties en Limburgensia versjene op gereigelde tieje.
Zien bekèndste werk dat ies oetgegeve zint opsjtèlle euver de Limburgse dialekte mèt es titel De Chinezen van Nederland (1977. herz. drök 1988). In 1983 versjeen ’t beukske: Aanwijzingen voor de spelling van de Limburgse dialecten, dat nog ummer de basis vörmp van de hudige Veldeke-sjpelling veur gans Limburg. Ouch waor Jan Notten co-auteur van ‘t gesjiedenisbook van Valkenburg-Houthem. (1979)
Notten waor mètopriechter en miè es 25 jaor veurzietter van Veldeke-krink-Valkeberg. De lètste jaore es ièreveurzietter. Hae waor lid van de sjpellingscommissie van Veldeke-Limburg. Jaorelank zoot ‘r in de commissie Veldeke-Literair.
Hae waor veurzietter van ’t Martin Stevensfonds (Bibliotheek van Limburgensia en Valkenburgensia), veurzietter van de 15-februarisjtiechting; penningmeister van de sjtiechting ‘’t Kruus op d’n Tore’, lid van de sjtraotnamecommissie in Valkeberg a/d Geul en jaorelank jurylid van de carnavalsoptochte in Valkeberg.
