Parzeläinsindustrie zu Lëtzebuerg
Vu Wikipedia, der fräier Enzyklopedie.
D'Parzeläinsindustrie ass vum Jean-François Boch zu Lëtzebuerg agefouert ginn. Eigentlech misst ee vun der Faïenceindustrie schwätzen. Well zu däer Zeit goufen nach nëmmen Artikelen aus gewéinlecher Faïence an der Usine am Rollengergronn (Siweburen) fabrizéiert, an nach kee Parzeläin. Duerfir ass haut och nach ëmmer Rieds vun der Faïencerie a net vun der rollengrënnescher Parzeläinsfabrik. De Jean-Franços Boch, gehéiert zu de groussen Pionnéiren vun der lëtzebuergescher Mëttelindustrie.
Hie war Fransous an hat ursprénglech eng Eisegéisserei a Loutrengen. Nodeems hien 1748 zu Däitsch-Oth (Audun-le-Tiche) ugefaang hat, Faïence-Géigestänn ze produzéieren, ass hien 1768 an de Rollengergronn no Siweburen komm an huet do ënnert dëm Numm: Jean-François Boch et frères seng Usine opgebaut. Mat vill Succès iwwregens. 1770 huet d'Faïencerie hire Brindille-Dekor agefouert, deen haut nach ënnert dëm Numm: Vieux-Luxembourg weltwäit bekannt ass.
Vun de Schwieregkeeten an de 1930er Joren huet d'Faïencerie sech erkritt an huet virum Zweete Weltkrich 230 Persounen beschäftegt, déi all Joer 60 Tonne Faïence-Geschir produzéiert hunn.
Déi grouss Ëmstellung koum nom Zweete Weltkrich, wéi d'Faiencerie sëch moderniséiert huet, Elektroiewen agesat huet, an zur Produktioun vu Parzeläin iwwergaang ass. Haut, 2004, huet d'Faïencerie Villeroy et Boch zu Siweburen 521 Persoune beschäftegt.
Inhaltsverzeechnes |
[Änneren] Aner wichteg Etappen an der Ëntwécklung vun der Entreprise
- 1791: De Nicolas Villeroy produzéiert an der Saar zu Wallerfangen wäisst Dëschgeschir mat Kofferopdrock,
- 1809: De Jean-François Boch keeft zu Mettlach un der Saar déi fréier Benediktiner-Abtei a fänkt mat der Produktioun vun wäissem Dëschgeschir, eng Art vu Parzeläin, un.
- 1836 De Nicolas Villeroy an de Jean-François Boch doen sech zesummen. Fir Villeroy et Boch ass dat den Ufank vun engem groussen Opstieg.
- 1959: Iwwergang zur Produktioun vu Vitro-Parzeläin.
