Film
Vu Wikipedia, der fräier Enzyklopedie.
De Film ass eng Konschtform, déi hiren Ausdrock an der Produktioun bewegte Biller fënnt. An der Regel ginn d'Biller mat engem Projektor op eng Leinwand geworf oder op engem Bildschirm gemaach, vu wou aus de Betruechter se erfaasst.
Déi vun der Filmkonscht geschafe Biller sinn ni real bewegt. Et ass éischter esou datt d'Illusioun vun enger Bewegung doduerch entsteet, datt Eenzelbiller (Frames) a séirer Offolleg gewise ginn. Ënnerscheeder an de Biller gi wéinst der Nobildwierkung op der Netzhaut vum mënschlechen A vun enger Vitesse vun ongeféier 12 Biller pro Sekond als Bewegung erfaasst.
[Änneren] Wiese vun der Filmkonscht
D'Filmkonscht erfuerdert en Zesummewierke vu verschiddene kënschtlereche Fäegkeeten, ënner anerem an de Beräicher Dramaturgie, Fotografie (Liichtdesign, Astellungsgréissten) an Tounkonscht. E Filmregisseur leet de Filmprojet, bal d'selwescht wéi e Regisseur dat am Theater mécht.
[Änneren] Geschicht
Haaptartikel: Geschicht vum Film
D'Technik vum Film baut u sech op d'Fotografie op. Alles ass ugaange mat der Entdeckung vum Stroboskopeffet, also dem Fait, datt Eenzelbiller am mënschleche Gehir zu enger Bewegung verschmëlzen, wa se séier genuch ofgespillt ginn.
Den Thomas Edison krut 1891 e Patent fir säi Kinetoskop, mat deem awer just eng Persoun gläichzäiteg e Film kucke konnt. D'Gebridder Auguste a Louis Lumière waren déi éischt, déi et fäerdeg bruecht hunn, mat dem Cinématographe Lumière déi bewegte Biller op eng Leinwand ze projezéieren. Den 28. Dezember 1895 weisen se mat hirem Apparat am Salon vum Grand Café zu Paräis deen éischte kommerzielle Film géint Entrée.
1909 gëtt zu Paräis de 35-mm-Film mat der Edisonperforatioun norméiert.
Ufanks konnte Filmer just a Kinoe gewise ginn. An der spéider éischter Halschent vum 20. Joerhonnert koum du mam Schlappekino, also dem Fernsee, déi éischt elektresch/elektronesche Variant vum Film op de Maart. An den 1960er Joren huet d'Filmkonscht erëm e Saz no vir gemaach mat der Aféirung vun der Videotechnik, an an den 1990er Joren nees ee amt der Entwécklung vun der Digitaltechnik an der DVD.
[Änneren] Kuckt och
- Lëscht vun alle Filmartikelen
- Lëscht vun alle Schauspillerartikelen
- Lëscht vun alle Schauspillerinnenartikelen
- Lëscht vun alle Fernsehserienartikelen
- Lëscht vun alle Regisseursartikelen
- Lëscht vun de Lëtzebuerger Kinoen
- Lëtzebuergesche Film
