Boeing

Vu Wikipedia, der fräier Enzyklopedie.

Cargolux Boeing 747-4R7F/LX-KCV um Findel

Boeing (The Boeing Company) ass ee vun de weltwäit gréissten Hiersteller vun zivilen a militäresche Fligeren an Helikopteren, genee wéi Militär- a Weltraumtechnik.

[Änneren] Geschicht

Schonn am Joer 1915 huet den Ingenieur William Edward Boeing, Jong vum däitschen Auswanderer Wilhelm Boeing, zu Seattle (US-Bundesstaat Washington) d’Aarbecht un der éischter “B&W”, zesumme mat sengem Kolleg George Conrad Westervelt ugefaangen. Wéi dësen d’Mataarbecht um Projet opginn huet, huet de Boeing déi éischt zwou “B&W” ouni seng Hëllef fäerdeg gestallt. D’Grënnung vun der Firma war 1916 ënnert dem Numm Pacific Aero Products Company. Schonn ee Joer méi spéit 1917 gouf d’Entreprise an Boeing Aeroplane Company ëmbenannt. De William Boeing huet un der Yale University studéiert an uschléissend fir d’éischt an der Holzveraarbechtungsindustrie geschafft, wou e Kenntnisser iwwer Holzstrukture krut, déi him fir seng spéider Carrière am Fligerbau nëtzlech waren. 1934 war seng Firma scho ganz grouss ginn. Wéinst der Gesetzgebung no der Depressioun, no deeër sech déi grouss Entreprisen an méi kleng Eenheeten hu missen opdeelen, ass de William Boeing ganz aus dem Betrib ausgescheed.

An de béide Weltkricher huet sech de Fligerbauer zu engem vun deene gréissten Hiersteller vu Notzfligeren, Bomberen, a Militäresche Kampf- an Iwwerwaachungsfligeren entwéckelt. 1997 huet Boeing d’Fligerbauer McDonnell Douglas, deen an der Tëschenzäit och vill Passagéierfligeren gebaut huet an sech genee esou am Beräich vun der Raumfahrt (Spaceshuttle-Technologie an Satellitenbau) zu enger Weltentreprise entwéckelt hat, an d’Aerospace Units vu Rockwell International (Boeing North American) iwwerholl.

Am Mäerz 2001 huet Boeing bekannt ginn, säi Firmesëtz zu Seattle opzeginn an sech en anere Standuert erauszesichen. Am Gespréich waren ënnert anerem Chicago, Denver oder Dallas, woubäi se sech schlussendlech fir Chicago entscheed hunn. D’Produktioun vu Fligeren ass dobäi awer net beaflosst ginn.

[Änneren] D'Kris vu Boeing

An de leschte Joren huet de Konzern e puer Réckschléi missen hinhuelen. Duerch d’Kriis am Loftverkéier an d’Terror-Attacken vum 11. September 2001 an den USA, wollt keng Fluchgesellschaft, den zwar schnellen, mee relativ onwirtschaftleche Sonic Cruiser bestellen. De Konkurrent Airbus huet doriwwer eraus awer ëmmer méi u Maartundeel gewonn. Dobäi koum dun och, dass de Konzern e groussen Optrag u Lockheed Martin verluer huet. De vu Boeing entwéckelten Militärfliger X-32 gouf vun der US Air Force net ugeholl. Ausserdeem huet d’NASA der Boeing Schlamperei wéint dem Columbia-Ongléck virgeworf.

Air France Boeing 747-400 F-GITI um CDG Terminal 2A zu Paräis

Boeing huet am Geschäftsjoer 2002 en Emsaatz vun 54,069 Milliarden US-Dollar bei engem Gewënn vun 492 Milliounen Dollar verbucht. 2002 huet Boeing 381 Fligere produzéiert, läit domat awer net méi virun Airbus. Weltwäit beschäftegt Boeing ronn 160.000 Mataarbechter a méi wéi 70 Länner.

2003 huet d’Entreprise bekannt gin, d’757-Produktioun Enn 2004 anzestellen – zënter den Terrorattacken 2001 goufe nëmmen 9 Fligeren vun dëser Zort bestallt. D'767, déi am transatlantesche Loftverkéier an deene leschten 20 Joer dominéiert huet, huet och keng Nofro méi.

Mat der 787, dem sou genannten “Dreamliner”, versicht Boeing um Maart, mat enger 250-Sëtzer-Maschinn erëm Fouss ze faassen.

2005 huet Boeing och bekannt ginn, de Modell 717 bis Enn 2006 aus der Produktioun ze huelen, als Grond gëtt erëm d’mangelnd Nofroo uginn.

[Änneren] Passagéier-Fligeren haut

Boeing 717 (entwéckelt vu McDonnell Douglas als MD-95; Produktiounsenn 2006)
Boeing 737 NG -600x, -700x, -800x, -900x (Kuerzbezeechnungen: 736, 737, 738, 739)
Boeing 747 („Jumbo-Jet“) -400, -400ER, -400F, -400ERF (Kuerzbezeechnung: 744)
Boeing 767 -200, -300ER, -400ER (Kuerzbezeechnungen: 762, 763, 764)
Boeing 777 -200ER, -300, -300ER, -200LR (Wordliner) (Kuerzbezeechnungen: 772, 773)
Boeing BBJ -BBJ, -BBJ 2, -BBJ 3

[Änneren] Geplangten Zivilfligeren

Boeing 7J7 (Enn 80er, geplangte 727-Noofolger, Projet agestallt)
Boeing Sonic Cruiser (Mëtt 90er geplangte Fliger, sollt knapp ënnert der Schallgrenz fléien, Projet agestallt)
Boeing 787 -3, -8, -9 („Dreamliner“; Bestellungen bis März 2006: 386)
Boeing 747-8 (moderniséiert an gestreckten Versioun vun der 747-400)
Boeing 777 -200F (Cargo-Versioun “Fracht”)

[Änneren] Auslaf-Modeller vu Passagéier-Fligeren

Boeing 247
Boeing B-307 Stratoliner
Boeing B-377 Stratocruiser
Boeing 707
Boeing 720
Boeing 727
Boeing 757

[Änneren] Militäresch Fligeren

Nieft Waffesystemer, Rakéiten, Helikopteren, (e.a. AH-64 Apache, RAH-66 Comanche), Iwwerwaachungs- a Schoulfligere produzéiert Boeing och nach Kampffligeren, Juegdfligeren, Bomberen an Tank- an Transportfligeren.