Simón Bolívar

De Wikipedia, le encyclopedia libere

Simón Bolívar

Simón Bolívar (24 de julio 1783, Caracas, Venezuela – 17 de decembre 1830, Santa Marta, Colombia) esseva un militar e politico sudamerican, propulsor del independentia de Venezuela, de Colombia, de Ecuador, de Peru, de Panama e de Bolivia.

Ille esseva de origine espaniol. Quando ille habeva novem annos de etate su parentes jam habeva morite. Su avunculo empleava varie preceptores pro inseniar le e educar le, sed ille esseva un problema disciplinari. In fin, su avunculo empleava Simón Rodríguez e le problema se resolveva. Le duo deveniva bon amicos.

Durante sex annos, usque le juvene compliva dece-quatro annos, Rodríguez le inseniava le ideas del grande philosophos europee de ille tempore, qui credeva in le libertate e le equalitate pro omne personas, pensatores como Rousseau, qui inseniava que "on pensa solmente de como proteger su filio… on debeva inseniar le a proteger se… como superviver, in caso necessari in le frigido penetrante de Islandia o in le rocca ardente de Malta". E tal cosas Rodríguez inseniava al juvene Bolívar. Con le lectiones scholar ille anque le inseniava a luctar e como viver in un silva e in le citate. Ille le inseniava a superviver situationes difficile.

Rodríguez debeva sortir de Venezuela in 1797 proque ille habeva participate in un revolution que faceva fiasco. In ille tempore il jam habeva gente que voleva liberar Venezuela ab le dominio espaniol.

Varie annos plus tarde, le duo Simones se reuniva de novo, viagiante trans Europa, le secunde visita de Bolívar a ibi. Ille arrivava al etate de dece-sex annos.

Al etate de dece-octo annos Simón Bolívar se maritava con le filia de un nobile espaniol e retornava con illa a Venezuela. Su juvene sposa moriva dece menses post arrivar a Venezuela a causa del febre jalne.

Simón retornava a Europa e iste visita cambiarea su vita. Ille esseva in Paris, Francia, ubi Napoleon Bonaparte se coronava imperator. Durante que ille observava centos de milles de personas tanto animate e allegre, il le pareva que le major desiro de un persona es vider se in le medietate de un gruppo de personas qui exprime assi ille typo de affecto e de amor. Ille dicerea plus tarde que isto le faceva pensar super su proprie paupere pais tanto infelice e del gloria que un persona obtinerea qui poterea liberar lo.

Con Simón Rodríguez de novo, ille visitava Roma. In un monte in le alto del citate, Simón Bolívar se genuflecteva e jurava que ille laborarea sin fatiga usque Venezuela esserea liberate ab le dominio espaniol. Bolívar dedicarea le resto de su vita a complir ille promissa.

Post multe annos terribile e duo revolutiones plus tarde Simón Bolívar comenciava a realisar su sonio.

Le initio, on pote dicer, occurreva in 1819. Bolívar jam habeva participate in un revolution dirigite per le General Francisco de Miranda. Illo esseva un fiasco. Un secunde revolution dirigite per Bolívar mesme faceva etiam fiasco. Ille quasi habeva succedite sed al fin ille perdeva contra le vaccheros del valle del Orinoco, qui luctava al latere del espanioles.

Dece-cinque annos post le juramento super un del montes de Roma, Bolívar dirigeva un exercitio de duo milles e cento homines usque Nove Granada (hodie Colombia e Panama) desde le region del Orinoco de Venezuela. Bolívar jam habeva habite fiasco in duo revolutiones sed iste vice, contra septe mille soldatos espaniol, ille triumpharea.

Ille habeva prendite cinque annos pro recomponer su nove armea, post le fiasco del secunde revolution, sed iste vice Bolívar se habeva unite al General Francisco de Paula Santander de Nove Granada. Insimul con alcun truppas britannic e irlandese illes liberarea primo Nove Granada e plus tarde Venezuela.

Il esseva le tempore de pluvias quando Bolívar sortiva. Il habeva tres camminos pro arrivar a Nove Granada. Bolívar seligeva le plus difficile proque le inimico non suspectarea ni expectarea que illes lo usarea. Avantiante con le armea, Bolívar iva de alto a basso animante su truppas. Ille adjutava le debiles e le malades.

Quando su armea passava trans le planas de Casanara, illes marchava durante un septimana con aqua usque le cinctura. Illes debeva poner lor fusiles supra lor capites. Il habeva necun sentiero e illes debeva aperir le cammino per le spisse silva. Il non habeva pontes e isto faceva que illes avantiava lentemente.

Al fin del planas illes se incontrava con le Montanias del Andes. Bolívar perdeva multe soldatos in le montanias. Multe soldatos moriva del frigido e alteres retornava a causa de maladia e del terreno impenetrabile a alcunes de lor cavallos. Sed Simón Bolívar continuava in avante, dirigente le armea per le montanias e descendente a Nove Granada.

Quando Bolívar arrivava a Nove Granada, su armea contava solmente alcun centos de homines. Sed su plano de surprender le espanioles esseva un successo. Quando le soldatos espaniol se recuperava del confusion, il esseva multo tarde: Bolívar habeva triumphate. Al tertie die su armea arrivava a Bogotá. In decembre ille esseva nominate presidente e chef militar del Republica de Colombia. Iste nove republica esseva formate de Nove Granada, Venezuela e Quito (nominate Ecuador plus tarde). Le sol problema esseva que grande partes de Venezuela e Ecuador remaneva sub dominio espaniol.

In junio 1821, Bolívar vinceva contra le espanioles in le battalia de Carabobo e Venezuela deveniva libere. Bolívar lassava le General Santander in carga del pais como ille lo habeva facite in Nove Granada e tunc se dedicava a liberar Ecuador.

In Ecuador Bolívar faceva le cognoscentia del grande amor de su vita: Manuela Sáenz.

In 1824, Bolívar con su chef de stato major, Antonio José Sucre, adjutava a liberar Peru. Alcun menses depost, Sucre liberava le Alte Peru. Iste nove pais decideva appellar se Bolivia in honor de Bolívar.

Bolívar esseva ora presidente de Peru, Bolivia e le Republica de Colombia, que includeva Nove Granada, Venezuela e Ecuador. Il se habeva proponite formar un liga de paises hispanoamerican. In 1826, il habeva un assemblea in Panama que includeva le paises de Bolívar, America Central, e Mexico. Le convention non habeva multe successo, sed esseva le initio de cooperation international.

In 1826, Simón Bolívar comenciava a perder le poter. Venezuela e Nove Granada non voleva plus esser unite in un sol pais. Il erumpeva un guerra civil e Bolívar sortiva ex Peru pro tentar conservar le Republica de Colombia unite. Ille non poteva facer lo. E le gente non amava le modo per le qual ille habeva prendite le pais. De facto ille escappava ab assassination unicamente per le corage e le sapientia de Manuela Sáenz in Bogotá, Colombia, in 1828.

In le medienocte Bolívar se eveliava con le latratos de canes e sonos estranie in le palatio. Ille prendeva su spada e su pistola e comenciava currer verso le portas, sed Manuela le deteneva. Le voces foras clamava "Morte al tyranno!" e "Morte a Bolívar!" Manuela aperiva un fenestra e Bolívar sortiva per illo. In iste momento le portas se aperiva con un grande colpo. Manuela prendeva un spada e confrontava le assassinos. Illes esseva multo surprendite per le action de iste femina, e illa les diceva que Bolívar esseva alibi.

Al fin, Bolívar arrivava al perception que ille habeva devenite un obstaculo pro le paises que ille mesme habeva adjutate a liberar. In vista de isto, in maio 1830 ille decideva a sortir de America del Sud e viagiar a Europa. Nonobstante, quando ille esseva justo super le puncto de partir, ille recipeva novas que il habeva problemas in Bogotá e ille cancellava su viage. Ille restava al casa de un cavallero espaniol qui sempre habeva admirate Bolívar. Ibi Bolívar passava su tempore e il esseva ibi que ille moriva de tuberculosis le 17 de decembre 1830.