Raul Roco
Halì sa Wikipedia
Si Raul Roco sarong abogado na taga-Camarines Sur. Naging senador kan Republika kan Filipinas. Nagdalagan sa pagka-presidente kan 1998 alagad dinaog ni Joseph Estrada.
Inorganisa niya asin naging prominenteng tao kan partido Aksyon Demokratiko(AD).
Pinalawig Na Pagpabisto. Si Raul S. Roco igdi sa Ciudad nin Naga namundag kan Okt. 26, 1941. An mga magurang nya iyo sa Sulpicio A. Roco, sarong paraoma, asin si Rosario Orlando Sagarbarria, sarong maestra sa eskwela publika. Naghayskul sa Ateneo de Naga na natapos nya sa edad sanang 14 anyos, dangan sa edad na disi-otso (18), nagtapos na magna cum laude sa San Beda College, sa Manila. Tinapos nya sa San Beda an Bachiller de Artes , major sa Ingles.
NagMaster sya sa Comparative Law sa Unibersidad kan Pennsylvania, E.U. asin duman nag-adal pa sya sa Wharton School kun saen kinua nya an adal sa Multinational Studies. Huli sa saiyang paghingoang pambihira, napili siyang presidente kan National Union of Students asin napabilang man sa Ten Outstanding Young Men of the Philippines (TOYM) kan taon 1964.
Sya man an pinakahuben na delegadong Bicolano sa Constitutional Convention kan 1971 asin siring man, iyo sya an pinakahuben na nagin presidente kan Integrated Bar of the Philippines (1983-1985).
Dakul na taon nagpraktis sya sa pagka-abogado alagad naglaog sa pulitika. Nagin syang Representante kan segundo distrito kan Camarines Sur (1987-1992)na kun saen natawan syang citation kan Ford Foundation asin kan UP Institute of Strategic and Development Studies (ISDS) na iyo an pinakamahusay na lehislador duman sa ika-8 Kongreso.
Duwang termino nagin man syang Senador (1992-2001) kan Pilipinas asin dakul syang mga leyes na napapasar na nagdarang dakulang pankinabang sa banwaan.
Sya an autor kan ley na nagreporma kan central banking system kaya naapod siyang "Ama kan Bangko Sentral". Sya man an nag-ama kan "Intellectual Property Code" asin kan "Securities Regulation Code."
Naapod man syang "Honorary Woman" por medyo kan mga layi na pinahaman nya na nagtaas kan dignidad kan mga Pilipina asin nagpalakbang kan mga oportunidad ninda sa pag-asenso sa buhay. An mga leyes na ini para sa babae iyo an ""Women in Nation Building Law", an "Nursing Act,", an "Anti-Sexual Harrassment Law," an "The Child and Family Courts Act", asin an "Anti-Rape Law,"
Husto na sana an pagmakulog nya sa mga Pilipinong nagtratrabaho sa luwas kan Pilipinas asin napawara nyang saysay idtong ley na nagreresulta sa "na dodobleng pagbubuwis" kan mga OFW. Pirang beses, napili asin pinaghukoman syang "Outstanding Senator" kan dakul na mga organisasyon huli ta mahigos syang senador asin dakul an nahaman sa katongdan nyang pagka-senador.
Pinawa'ran nyang saysay man an "Anti-Subversion Law" asin kun ano-ano pang mga leyes pinapasar nya sa Senado ngani magrikas an pag-administrar kan hustisya.
Kan sya nagin Sekretaryo kan Edukasyon, sya pa sana an nagpa-otob kan sinasabing libreng pagpaadal sa elmentarya asin hayskul. Tina'wan nya man nin oportunidad na mapagantad an adal asin dunong kan mga maestra sa eskwela publika sa pagigin mga iskolar ninda asin pina-bidding nyang hayag-hayag an pagbakal gamit sa mga eskwelahan mala ta grabi an naademohan kan Department of Education sa gasto.
Nagwalong bulan lang sya totoo na nagtukaw bilang Sekretarya sa Edukasyon.
Si Roco inorganisar an Aksyon Demokratiko asin nagkandidato para presidente kan 1998 alagad dai nakaluwas.
An agom nya iyo si Sonia Cubillo Malasarte na taga-Bohol asin nagbunga an saindang pagsasaro nin anom na aki na iyo sinda: Robbie Pierre, Raul Jr., Sophia, Sareena, Rex asin si Synara. Nagadan sya kan Agosto 5, 2005 sa edad na 63 anyos.
