Giuseppe Piazzi
De Uiquipedia
Giuseppe Piazzi foi un astrónomu y sacerdote italianu, monxu teatín. Ñació en Ponter (Valtellina)'l 7 de xunetu de 1746 y morrió en Nápoles el 22 de xunetu de 1826. Fundó l'observatoriu astronómicu de Palermu.
El 1 de xineru de 1801, descubrió un oxetu estelar que se desplazaba pel fondu d'estrelles: el so movimientu yera retrógradu primeru y direutu depués, de mou que camentó que yera un nueu planeta; na carta remitida al so collaciu Barnaba Oriano, de Milán, ansí lu indicaba anque cuandu escribió a Joseph Lalande (en París) y a Johann Elert Bode (en Berlín) nun quinxo arriesgase: anunció-yos el descubrimientu d'un nueu "cometa".
Piazzi bautizólu col nome de Ceres Ferdinandea, pola diosa griega y siciliana, y pol rei Fernandu IV de Nápoles y Sicilia. Más alantre, el Ferdinandea eliminóse por razones polítiques. 1 Ceres resultó ser el primer asteroide que s' observaba del cinturón d'asteroides y, fasta anguañu, el de mayor tamañu conocíu.
Poques selmanes depués perdióse nel resplandor solar d'ocasu: basándose nes poques observaciones disponibles Gauss creyó una ferramienta matemática nueva, cola cuala puo predicir la posición del asteroide; meses más sero recuperabase nuevamente Ceres.
A los pocos díes William Herschel col so gran reflector emplegando elevaos aumentos, determinaba'l diámetru micrométricu del cuerpu y (basándose na distancia ,determinada pol cálculu orbital de Gauss) el tamañu real del mesmu: en tornu a 260 km. Si yera un planeta yera demasiao pequeñu; en marzu de 1803 un nueu "planeta" (más sero asteroide, nome suxeríu por Herschel) sumábase a la llista al descubrir Heinrich Olbers el diminutu Palas.
Piazzi dedicóse demientres munchu tiempu a ellaborar un catálogu d'estrelles, güei en desusu, que presentaba la posición esauta de dellos miles d'elles; ceo sedría superáu pol de Friedrich Bessel primeru (unes 75 000 estrelles) y Friedrich Argelander depués (con más de 259 000).
