O chilo
De Biquipedia
O chilo (Skrik, en noruego, 1893) ye un de os cuadros más conoixitos de o espresionismo, e una de as prenzipals obras de l'artista noruego Edvard Munch. Simboliza l'ombre moderno sozmeso á una crisis d'angustia esistencial. O paisache de o fondo ye o fiordo d'Oslo, bisto dende o tozal d'Ekeberg.
Munch fazió cuatre bersions de o cuadro, estando-ne as más conoixitas una feita con temperas sobre cartón (museyo Munch d'Oslo), e una feita con olios, temperas e pastels sobre cartón (Galería Nazional d'Oslo). A terzer bersión perteneix tamién á o museyo Munch, e a cuatrena ye en una colezión particular.
Respeutibe á O chilo, Munch escribió:
- Feba una gambadeta con dos amigos per un camín -o sol s'ascondeba- e de sopetón o zielo se tornó d'un royo sangre... Cansato, m'aturé, emparando-me sobre un cletato... Bi eba sangre e luengas de fuego dalto de o fiordo azulnegro e de a ziudat... Os amigos míos continoron; yo me i quedé, tremolando d'angustia... E sentié un chilo infinito que esnabesaba l'uniberso.
O 12 de frebero de 1994, raporon o cuadro de a Galería Nazional. En primeras se sospeitó de os autibistas antialbortistas de Noruega, pero a sospeita resultó falsa. Tres meses dimpués, demandaban 1 millón de dólars americanos á o gubierno noruego per o cuadro, pero lo gubierno i refusó. Retroboron o cuadro lo 7 de mayo per meyo d'una operazión de a polizía noruega en colaborazión con a polizía britanica e o museyo Getty.
En 1996, o cuadro estió d'inspirazión ta Wes Craven en a zinta clamata Scream (O chilo) á l'ora de creyar a mascarota que i porta l'asasinador.
O 22 d'agosto de 2004, raporon á man armata la bersión más conoixita de o museyo Munch, debez que un altro cuadro de Munch, a Madonna. Seguntes o diario sueco Svenska Dagbladet, o cuadro ye estato cremato.
