Arquiteutura

De Biquipedia

Chapistel romanico en Alquezra

L'arquiteutura ye l'arte y a zenzia de diseñar edifizios. En os sieglos pasatos, os arquiteutos s'ocupaban, antimás de diseñar os edifizios, de diseñar as ziudaz, plazas, albareras y parques, y oxetos d'emplego en as edificazions, como los muebles. Güe en diya, os profesionals que proyeutan y planifican l'espazio urbán son os urbanistas, establiendo-se en una espezialidá distinta a l'arquiteutura u a incheniería zebil, a cuala se clama urbanismo, en tanto que a ros profesionals que creigan muebles y atros oxetos, li'n conoxe como Diseñadors Industrials.

Seguntes un topico popular, en o tratau más antigo que se conserba sobre a matiera,"De Architectura", de Vitruvio, Sieglo I a.d.C., se dize que l'arquiteutura discansa en tres comenzipios: a Polideza (Venustas), a Zereñura (Firmitas) y l'Utilidá (Utilitas). L'arquiteutura se puede definir, allora, como un equilibrio entre istos tres alazez, sin sobrepasar garra a l'atros. No aberba sentiu tratar de replecar un treballo d'a arquiteutura sin adempribiar istos tres aspeutos.

Sin dembargo, prou con leyer o tratau ta percaber-se de que Vitruvio desixia istas carauteristicas ta bels edifizios publicos mui particulars. De feito, cuan Vitruvio se atribe a intentar un analís d'o arte sobre o que escribe, proposa replecar l'arquiteutura como composada de cuatro alazez: orden (relazión de cada parti con o suyo emplego), disposizión ("As espezies de disposizión [...] son o trazau en planta, en debantato y en prespeutiba ."), proporzión ("Consonanzia uniforme entre l' obra entera y os suyos miembros.") y distribuzión (en griego oikonomía, pende "en o debiu y millor emplego fesable d'os materials y d' os terréns, y en precurar o menor coste d'a obra consiguiu d'un modo razional y aponderau.").

Bi ha que dar-se cuenta de que as suyas embudias a lo respeutibe son pro intensas, pos cuatro pachinas más adebán dibide l'arquiteutura en tres partis: Construzión, Gnomica y Mecanica. Por intresán que siga, no debe olbidar-se que este tratau ye l'unico tratau clasico que nos ha arribato, y a prebabilidá de que siga lo millor d'a suya epoca ye chicota.

A istoria d'as dibersas bersions d'o tratau de Vitruvio resume bien o conflito a l'ora de definir l'arquiteutura. En 1674, Claude Perrault, merico fesiologo, espezializau en diseuzión de calabres, güen debuxán, publica a suya traduzión resumida d'o tratau de Vitruvio, que queda de raso reorganizau. Sin dembargo, ba a estar grazias a lo «resumen» de Perrault que Vitruvio ba a estar boziato y ba a influyir en os trataus y tiorías d'os sieglos siguiens. Y ye en ixe resumen en o que a triada bitrubiana ba a beyer a luz.

A esferenzia sustanzial entre a bersión de Perrault y l'anteriors radiga, seguntes José Luis González Moreno-Navarro, en que Perrault terxibersa" o caráuter sintentico d'a arquiteutura en una bisión analitica y esflecada en tres brancas autonomas lo que ye una consecuenzia d'o suyo tarabidau mental [...] formata a lo largo d'una bida adedicada a l'analís d'os organismos bibos, que en dengún inte apañaba y tornaba a dar bida".

Por o contrario, seguntes Vitruvio "l'arquiteutura ye una zenzia que surte de muitas atras zenzias, y emperifolla con mui bariato aprendizache; por l'aduya de que un chuizio se forma d'ixos treballos que son o resultau d'atras artes. A prautica y a tioría son os suyos pais. A prautica ye l'alufradura cutiana y continada d'o modo d'executar bel treballo dau, u d'a operazión d'as mans, t'a combersión d'a matiera d'a millor forma y d'a maniera más rematada. A tioría ye o resultau d'ixe razonamiento que contrimuestra y esplica que o material forxau ha estau combertiu ta resultar como lo fin propuesto. Porque l'arquiteuto nomás prautico no ye capable d'asinnar as ragons pros t'as formas que er afilla; y l'arquiteuto de tioría ralla tamién, agafando a güembra en begada d'a sustanzia. O que ye tiorico asinas como tamién prautico, capable no nomás de prebar a combenienzia d' o suyo diseño, so que tamién de levar-lo en execuzión."

Como disziplina, a importanzia de l'arquiteutura en o sieglo XX estió graniza, pos o suyo exerzizio estió responsable de no menos d'a terzera parti d'os materials portiaus por l'umanidá en ixa epoca. Ta más detalles respeutibe d'as relazions entre l'arquiteutura y a ecolochía, beyer "Arquiteutura, economía y ecolochía".

Mui intresán como replega y reflesión sobre as dibersas definizions d'arquiteutura a lo largo d'a istoria ye l'obra d'o cretico italiano Brun Zevi "Architectura in Nuce".

A parabra arquiteutura ye emplegata tamién t'o diseño u l'auto de diseñar atros sistemas complexos, por exemplo, arquiteutura de computadoras y arquiteutura de software.