Alphonse Daudet

From Wikipedia

Alphonse Daudet

Alphonse Daudet, nascìu a Nîmes lu 13 di maiu 1840 e murìu a Pariggi lu 16 di dicèmmiru 1897. Fu un rumanzieri francisi. Lu sô sipolcru s'attrova ntô Cimiteru dû Père Lachaise a Pariggi.

Studia ntâ scola supiriuri a Lioni. Fu sicritaru pressu lu Duca di Morny, pirsunaggiu mpurtanti dû Secunnu Mperu, quannu chiddu murìu prestu ntô 1865: chistu avvinimentu ci canciàu la carriera di Alphonse. Doppu di chistu pirìudu, Daudet si cunzacràu sulu â scrittura, prima comu jurnalistu a Le Figaro poi comu rumanzieri. Doppu ca si fici un viaggiu ntâ Pruvenza, Alphonse accuminzàu a scrìviri li primi testi ca fannu parti dâ sô òpira "Li Littri dû mê Mulinu" (ntô francisi "Lettres de mon Moulin"). Poi arricivìu, dû diritturi dû jurnali l'Événement, l'auturizzazzioni di pubblicàrili commu feuilleton (= a episodi) duranti lu pirìudu stivi dû 1866, sutta lu tìtulu di Crònachi Pruvinciali.

Lu Mulinu di Alphonse Daudet a Fontvieille

Arcuni dî raccunti di chista òpira hannu arristatu ntra li stùri cchiù pupulari dâ littiratura francisi, comu "La Capra dû Signur Seguin" (ntô francisi "La Chèvre de Monsieur Seguin"), "Li Tri Messi Vasci" (ntô francisi "Les Trois Messes Basses") o "L'Elisir dû Rivirennu Gaucher" (ntô francisi "L'Élixir du Révérend Père Gaucher"). Lu primu veru rumanzu di Alphonse Daudet fu "Lu Nicu Cosa" (ntô francisi "Le Petit Chose") scriutu ntô 1868. Fu lu rumanzu autobiugràficu di Alphonse picchì parràu dû sô passatu di prufissuri nta na scola di Alès (ntô Gard, ô nord di Nîmes). Fu ntô 1874 ca Alphonse dicidìu di scrìviri: "Fromont jeune et Risler aîné" e macari "Jack" ntô 1876, "le Nabab" (1877), "les Rois en exil" (1879), "Numa Roumestan" (1881) o "L'Immortel" (1883). Ntô 1872 scrissi "Tartarin de Tarascon", chi fu lu sô pirsunaggiu mìticu. "Li Raccunti dû Luni" (ntô francisi "Les Contes du Lundi") ntô1873, n'òpira di raccunti suprâ Guerra franco-prussiana, lassa vìdiri lu sô gustu pi chistu gèniri e li raccunti maravigghiusi.