Brassband
Frå Wikipedia – det frie oppslagsverket
Eit brassband er eit musikkorps med messinginstrument og slagverk. Dei fyste moderne brassbanda oppstod tidleg på 1800-talet i Preussen, då alle militære og statlege musikkorps vart utstyrt med nye instrument med roterande ventilar, og vart pålagd å nytte standardstemming (ei sams referansefrekvens for alle korps). Dette førde til at musikarane lettare kunne spele med andre, og gjorde det òg mogleg å slå saman små grupper til større korps.
I Noreg finst det brassband for amatørmusikarar. Dei fleste norske brassbanda er medlem i Norges Musikkorps Forbund. Det vert årleg arrangert eit noregsmeisterskap for brassband for vaksne musikarar og tilsvarande for barn og unge. I tillegg finst det eit titals andre tevlingar og stemner for korps.
I Storbritannia er det sterke tradisjonar for brassband, medan det i kontinental-Europa er meir vanleg med janitsjarkorps. Den norske brassbandtradisjonen har hovudsakleg vore plassert på Vestlandet, og dei fleste vinnarane av Noregsmeisterskapen for brassband kjem frå anten Hordaland eller Rogaland. Fleire korps frå Vestlandet har òg vunne internasjonale tevlingar og priser for spelinga.
Eit brassband har til vanleg desse instrumenta:
- Kornett i Ess (Ess-kornett (1), soprankornett(1))
- Kornettar i B♭ (solo- (4), repiano-, andre- (2), tredje- (2))
- Flygelhorn i B♭
- Althorn i Ess (solo- (1), første- (1), andre- (1))
- Baryton (G-nøkkel B♭) (første- (1), andre- (1))
- Tenortrombone i B♭ (første- (1), andre- (2))
- Basstrombone i B♭ (notert i F-nøkkel) (1)
- Eufonium i B♭ (2)
- Ess-tuba (2)
- B♭-tuba (2)
- Slagverk (2/3)
