Hektar
From Wikipedia
De Hektar (Eenheitenteken: ha) is ene Maateenheit för de Fläch. Een Hektar is 10.000 Quadratmeter groot. De Eenheit sett sik ut de Wöör hekt(o) (100) un Ar (Eenheitenteken: a) tohoop. De Eenheit Ar is hüüt aver nich mehr begäng. De Hektar warrt faken in de Land- un de Forstweertschop bruukt, aver ok annerwegens, wo vun Flächen snackt warrt, för de Quadratmetertallen to grote Tallen un Quadratkilometertallen temlich lütte Tallen sünd. Ar un Hektar höört nich to dat SI-Eenheitensystem, aver se sünd doch tolaten.
Sik utdacht hebbt de Franzosen 1793 den Ar, as se ok den Meter as den teihnmillionsten Deel vun den Eerdquadranten op den Meridian vun Paris fastsett harrn. To dat Längenmaat Meter keem dat Flächenmaat are (anlehnt an dat latiensche Woort ārea för Fläch) för ene Fläch vun 100 m². In’t Johr 1868 hebbt se de Eenheit ünner den Naam Ar ok in Düütschland amtlich inföhrt.
- 1 a = 10 m × 10 m = 100 m²
- 1 ha = 100 m × 100 m = 10.000 m²
- 100 a = 1 ha
- 100 ha = 1 km²
