Кохиба (марка на пури)

Од Википедија, слободна енциклопедија

Амблемот на Кохиба

Кохиба (шпански: Cohiba) е име кое го носат две марки на висококвалитетни пури - едната се произведува во Куба, а другата во Доминиканска Република. Во оваа статија се зборува само за кубанската „Кохиба“.

Името Кохиба доаѓа од таинскиот (староседелски кубански) јазик и значи „тутун“. Кохиба првобитно била приватна марка која исклучиво го опслужувала Фидел Кастро и важните личности од кубанската влада и политичари од комунистичката партија. Бидејќи често се давала како дипломатски подарок, марката Кохиба станала култна. Јавното продавање на фирмата започнало во 1982 год.

За кубанската „Кохиба“ се користи само најдобриот тутун во Куба. Тутунот се бира од најдобрите Vegas Finas de Primera (првокласни полиња со тутун) во зоните Сан Луис и Сан Хуан и Мартинез во регионот Вуелта Абахо, провинција Пинар дел Рио и се ферментира три пати и со тоа тутунот добива блага арома. Првобитно сите пури на Кохиба биле изработувани во фабриката Ел Лагуито која била сместена во приспособена хациенда во периферијата на Хавана. Подоцна, производството на некои витоли било проширено и во други фабрики.

Дел од палетата на производи на Кохиба

[уреди] Историјат

Кохиба започнала со пурите кои ги пушел телохранителот на Кастро по име Бјенвенидо „Чико“ Перез. Кастро забележал дека тој често пушел „многу ароматична, многу фина“ пура. Кога тој го запрашал од каде ги набавува пурите, овој одговорил дека ги добива на подарок од пријател кој сам ги витка.

Тој пријател бил виткач во фабриката Ла Корона во хавана и се викал Едуардо Ривера. Кастро го запослил него и пет други виткачи и ги сместил во дипломатска куќа. Подоцна оваа фабрика станала првата во која работеле само женски torcedoras (виткачи).

Пурите се произведувале само за Кастро и други високи функционери и често се давале како подарок на странски државници. Самоиот Кастро бил приврзаник на долгите, тенки пури кои се виткале за него, посебно на големините кои подоцна се именувани како Лансеро и Корона Еспесијал.

По повод Светското фудбалско првенство во 1982 во Шпанија, Кастро решил да ги пушти во продажба неговите лични пури како ексклузивна марка. Кога била лансирана за прв пат таа година, марката Кохиба се состоела од три витоли или големини: Панатела, Корона Еспесијал и Лансеро. Во 1989 биле додадени три други големини (Робусто, Ексквизито и Есплендидо) и заедно овие три витоли ја сочинувале таканаречената Línea Clásica.

Во 1992, во чест на Кристофер Колумбо и неговите патешествија во Америка, Хабанос СА ги лансирала првите големини на т.н. Línea 1492, со тоа што секоја големина била наречена по секој век кој одминал од откритието на Колумбо. Првично биле лансирани Siglo I, Siglo II, Siglo III, Siglo IV, and Siglo V, а Siglo VI била додадена во 2002.

Вон стандардните производи, Хабанос СА редовно пласира и огранечени изданија по повод настани како годишниот Хабанос Фестивал, јубилеи на марката и нивната годишна Edición Limitada која е посебно издание на разните нивни пури во специјални облици и големини завиткани во темен одлежан тутун.

Кохиба исто така произведува два типа на машински изработени цигариљоси: Mini и Club.

Хабанос СА исто така произведува цигари Кохиба од 1987 и коњак (Extra Cohiba Cognac) од 1999.

По податок од 2006 Кохиба има лансирано разни пури од т.н. Edición Limitada: Пирамида во 2001, Двојна Корона во 2003 и Сублиме 2004.