Ferdinand Magellan
Vu Wikipedia, der fräier Enzyklopedie.
De Fernão de Magalhães, och alt nach Ferdinand Magellan, gebuer ëm 1480 a gestuerwen de 27. Abrëll 1521 op der Insel Mactan (Philippinen), war e portugisische Séifuerer.
Mat 12 Joer koum de Jong vun engem portugiseschen Adlegen op de kinneklechen Haff fir do erzunn ze ginn. Mat 25 Joer huet hien un enger Expeditioun an Indien deelgeholl an huet bannent e puer Joer an de Kolonië geschafft. Wéi hie wéint Beschëllgigungen vu Verontreiung vu Gidder vum portugiesische Kinnek an e schlecht Liicht gerode war huet de Fernão de Magalhães dem Keeser Karel V. seng Dingschter ugebueden. Säi Plang fir um Westwee bäi d'Gewierzinselen ze kommen, huet dem Karel V. gefall.
Den 20. September 1519 huet de Fernão de Magalhães sech mat 5 Schëffer fir déi éischt Weltëmsegelung op de Wee gemaach. No der Iwwerfahrt iwert den Atlantik ass de Magalhães vu Rio de Janeiro no Süden bis zur Bucht San Julian un der Südküst vun Argentinien geseegelt. Do huet hie a Laf vum Wanter eng Meuterei missen néierschloen. Am Oktober 1520 huet hien déi no him benannte Magellan-Strooss tëschent dem Festland a Feierland entdeckt an ass duerch si mat 3 Schëffer an de Pazifeschen Ozean komm.
Am Mäerz 1521 huet hien d'Marianen an d'Philippinen erreecht. Wéi hien aus Frëndschaft mat engem Häuptling vun den Urawunner un engem Sträit deelgeholl huet gouf hien dobäi doutgeschloen. Duerno huet de Juan Sebastián Elcano dem Magalhães seng Weltëmsegelung zu Ënn bruecht. Am September 1522 ass d'"Victoria" als eenzegt Schëff mat Gewierzer vun de Molukken an 18 Iwwerliewenden a Spuenien ukomm.
