Milliáttir
Úr Wikipediu, frjálsa alfræðiritinu
Milliáttir eru áttaheiti, sem liggja á milli höfuðáttanna fjögurra, norðurs, austurs, suðurs og vesturs. Höfuðáttirnar fjórar skipta sjóndeildarhringnum í fjóra fjórðunga, sem hver um sig er 90° þar eð áttirnar eru hornréttar. Í hefðbundinni siglingafræði er þessum níutíu gráðu bilum skipt hverju um sig í 8 jafna hluta með sjö milliáttum og verða þá 11,25° í hverjum hluta. Milliáttirnar heita nöfnum, sem dregin eru af heitum höfuðáttanna, svo sem hér greinir:
Frá norðri til austurs:
- norður (höfuðátt)
- norður að austri
- norðnorðaustur
- norðaustur að norðri
- norðaustur
- norðaustur að austri
- austnorðaustur
- austur að norðri
Frá austri til suðurs:
- austur (höfuðátt)
- austur að suðri
- austsuðaustur
- suðaustur að austri
- suðaustur
- suðaustur að suðri
- suðsuðaustur
- suður að austri
Frá suðri til vesturs:
- suður (höfuðátt)
- suður að vestri
- suðsuðvestur
- suðvestur að suðri
- suðvestur
- suðvestur að vestri
- vestsuðvestur
- vestur að suðri
Frá vestri til norðurs:
- vestur (höfuðátt)
- vestur að norðri
- vestnorðvestur
- norðvestur að vestri
- norðvestur
- norðvestur að norðri
- norðnorðvestur
- norður að vestri
- norður (höfuðátt)
og er þá hringnum lokað. Þannig eru áttaheitin 32 alls, 4 höfuðáttir og 28 milliáttir.
