Guð

Úr Wikipediu, frjálsa alfræðiritinu

Guð er hugtak haft um hverskyns yfirnáttúrulega veru, sem oftar en ekki er æðsta vera í tilteknum trúarbrögðum og jafnvel almáttug.

Guð er afar flókið að skilgreina nákvæmlega vegna þess hversu mismunandi skilgreiningar eru eftir trúarbrögðum og kenningum. Helstu kenningarnar eru fjórar, eingyðistrú, fjölgyðistrú, frumgyðistrú og algyðistrú. Eingyðistrú gerir ráð fyrir einum guði, sem oftast er almáttugur og skapari veraldar; dæmi um þetta er kristni. Fjölgyðistrú getur haft fjöldann allan af guðum og sinna þeir jafnan mismunandi hlutverkum (frjósemisguð eða stríðsguð t.d.) og hafa valdaskipti og jafnvel yfirguð, dæmi um þetta er ásatrú. Frumgyðistrú telur guð vera afl eða kraft af einhverju tagi, stundum frumhreyfil sem kemur gangverki heimsins af stað. Dæmi um þetta guðshugmynd Aristótelesar. Algyðistrú er sú kenning að guð sé allt og sé alls staðar, dæmi um þetta er hindúasiður.

[breyta] Orðsifjar og notkun í íslensku

Orðið guð er bæði til í hvorugkyni og karlkyni í íslensku og er notað bæði sem sér- og samnafn. Goð og guð eru náskyld hugtök, goð er þó oftar notað um guðlegar verur í fleirgyðistrú, til dæmis í ásatrú. Upphaflega skildust þessar tvær myndir að vegna hljóðvarps.