Castela
Na Galipedia, a wikipedia en galego.
Castela (en castelán Castilla) é un territorio histórico da Península Ibérica, antigamente foi un reino e pódese considerar nación dende un punto de vista histórico pero non xurídico.
[editar] Xeografía
Administrativamente Castela non ten recoñecemento oficial, o territorio da rexión de Castela posuía as seguintes provincias:
- Madrid
- Ávila, Burgos, Palencia, Segovia, Soria e mais Valladolid en Castela e León
- Ciudad Real, Cuenca, Guadalajara e mais Toledo en Castela-A Mancha
Hai un certo movemento en varias provincias, popular e político, que di que non forman parte de Castela as tres provincias do antigo reino de León: León, Salamanca e mais Zamora (as dúas últimas, segundo o momento histórico), incluso certas veces partes de Valladolid e Palencia, que na actualidade si forman parte de Castela e León. Tamén se di que a provincia de Albacete non é Castela pois historicamente foi parte da Rexión de Murcia. Desde certos movementos políticos e culturais incluso se reclaman as comarcas de Requena y Utiel, actualmente na Comunidade Valenciana, pois historicamente foron parte da provincia de Cuenca.
- Poboación: 9.521.132 habitantes (2003)
- Superficie: 150.281 km2
- Densidade de poboación: 63,4 hab/km2
- Cidades importantes: Madrid, Valladolid, Burgos
[editar] Historia
Castela xurdiu como condado vasalo do Reino de León. Debe o seu nome á gran cantidade de castelos na zona. No século IX independizouse de León, aínda que os dous reinos reunificáronse definitivamente no século XIII.
Durante a Idade Media, o Reino de Castela foi espallándose cara o sur, conquistando territorio aos mouros. Dende o tempo dos Reis Católicos dividíase en dúas rexións: Castela a Vella, que correspondía á metade norte e tiña a capital en Valladolid ou Burgos, e mais Castela a Nova, no sur do Sistema Central e con capital en Madrid.
Na época moderna Castela converteuse en nación hexemónica cultural e dominadora económica da Península Ibérica. Despois da Guerra de Sucesión Española confirmouse o castelán coma lingua oficial en toda España e creouse un modelo de estado xacobino baseado no modelo castelán.
Ao creárense as autonomías, Castela a Vella perdeu as dúas provincias de fóra da Meseta, A Rioxa (esta terra pertencía, na Idade Media, a Navarra e foi invadida pelos casteláns) e mais Cantabria, e engadiuse á rexión de León, formando Castela e León. Castela a Nova dividiuse na Comunidade de Madrid, que abarcaba soamente a provincia de Madrid, e mais Castela-A Mancha, que gañou a provincia de Albacete, que ata entón formaba parte da Rexión de Murcia.
Na actualidade existen algúns partidos nacionalistas casteláns minoritarios, coma Tierra Comunera (TC) ou Izquierda Castellana (Iz-Ca) que defenden a unión de todas as comunidades autónomas castelás. Ningún destes partidos ten actualmente representación en ningún dos parlamentos autonómicos.