Leonardo Zanier
De Vichipedie, la enciclopedie libare dute in marilenghe.
Leonardo Zanier (Maranzanis, Comelians, 1935) al è un dai plui impuartants poetis furlans modernis, oltri che sindacalist. Come tancj furlans e cjargnei, al scugnì emigrâ, su lis olmis dal pari e dal nono, e al là prime un àn in Maroc, tal 1954; parât vie di lâ cun ducj i europeans, al provà a tornâ a Comelians, a meti su une scuele, ma al ven clamât soversîf, masse politic, par cui al tornà a partî pe Svuizare, dulà ch'al reste par 20 agns, imparant il todesc e insegnant ai emigrâts; tal 1975 al tornà in Italie, a Rome, lavorant tal ufici pes ricercjis dal ECAP, ent di formazion professionâl de CGIL. Cumò al vîf tra Rome e la Svuizare, simpri impegnât intal cjamp de emigrazion.
Zanier al è considerât il plui grant cjantôr de emigrazion furlane, che à colpît soredut la Cjargne, dulà che intîrs paîs a si son disvuedâts, sei par chei che emigrin dome par une stagjon, sei par chei che a son emigrâts definitivementri ator pal mont; lis sôs oparis a son tal furlan 'cjanalot' dal cjanâl di Guart, une variant arcaiche cu la desinence in -a e une fonetiche particolâr, cence uniformâsi a la variant standard, ma doprant simpri un furlan autentic (cuant che par esempli chel di Pasolini al jere ogni tant sfuarçât, leterari, lontan dal fevelâ de int), ma zontant ancje ca e là peraulis par talian, par caraterizâ i diviers personaçs. I temis ricorints a son il ricuart de Cjargne, dai peçs (abete rosso) ai monts, a chei che tornin vecjos, a chei che no tornaran, a lis feminis che a spietin cjase, la sperance, il sens di colpe e cussì vie.
La sô prime opare e fo la racuelte di poesiis Libers... di scugnî lâ, buride fûr tal 1964 e daspò tradusude intun grum di altris lenghis; tai ultins agns al à scomençât a dedicâsi ancje a la prose.
[cambie] Bibliografie
- "Linia dreta" Storiuta cjargnela par durmî, Ed. Urban Center ONLUS Avrîl 2006
[cambie] Cjale ancje
- Emigrazion furlane
