Antonia Minor
Wikipedia(e)tik
Antonia Minor (latinez Julia Antonia Cretica Minor)(K. a. 36 - K. o. 37) Klaudio enperadorearen ama eta Kaligularen amona izan zen. Oktavia Turina Minor (Augustoren arreba) eta Marko Antonioren alaba gazteena izan zen. Antoniaren birtute eta edertasunak Augustoren biloba kutunena bihurtu zuten. Minor goitizena jaso zuen Antonia Maiorrez, Neronen amonaz, bereizi ahal izateko.
Atenasen jaio zen Antonia. Ez zuen aita inoiz ezagutu, K. a. 32an gurasoak dibortziatu zirelako eta K. a. 30ean, Kleopatrarekin batera bere buruaz beste egin zuelako Marko Antoniok. Antonia ama, osaba Augusto eta izeba Livia Drusilarekin hazi eta hezi zen.
K. a. 16an, Druso jeneralarekin ezkondu zen. Druso Livia Drusilaren semea, Augustoren semeordea eta Tiberioren ania izan zen. Seme-alaba franko izan arren, hiruk baino ez zuten haurtzaroa igaro: Germaniko jeneral ospetsua, Livila eta Klaudio enperadorea. Halaber, Antonia Kaligula eta Agripina Minorren amona izan zen, eta Neron enperadorearen berramona. Druso K. a. 9an hil zen Germanian borrokatzen ari zela. Augustok berriro ezkontzera bultzatu arren, Antonia alargun geratu zen.
Erroman hezi zituen seme-alabak Antoniak, Tiberioren zaindaritzapean. K. o. 19an, Germaniko hil zenean, Tiberiok eta Livia Drusilak hiletara joatea debekatu zioten. Livia Drusila hiltzean, K. o. 29an, Kaligula, Julia Drusila, Julia Livila eta Klaudia Antonia, bere berrilobak, hezitzeko ardura hartu zuen Antoniak.
K. a. 31an, bere alaba Livilak eta Seiano Pretoriar Prefektoak antolatutako konspirazioa Tiberiori ezagutarazi zion Antoniak. Seiano hil zuten Tiberioren aginduei jarraiki eta Livila Antoniaren esku utzi zuten. Kasio Dio historialariaren arabera, Antoniak Livila gela batean itxi zuen, gosez hil zen arte.
Geratzen zaion seme bakarra Klaudio zen, baina etengabe mezprezatzen zuen haren gaixotasuna eta herrentasunarengatik. "Naturak hasi baina amaitu ez zuen munstroa" deitzen zion, edo "nire Klaudio baino memeloagoa" esaten zuen.
Kaligulak, enperadore bihurtutakoan, ohore asko eskaini zion. Baita Augusta titulua ere, baina Antoniak muzin egin zion. Kaligularen apetez eta suminduraz asperturik, bere buruaz beste egin zuen Antoniak.
Enperadore izendatu ondoren, Klaudiok Agusta titulua eman zion amari. Haren urtebetetzea festa publikoa bihurtu zuen, non jokoak ospatzen ziren.
