Sinilihan

Halì sa Wikipedia

An sinilihan sarong popular na lutò nin gulay sa Rehiyon Bikol na bisto man sa apod na Bicol Express.

An sinilihan inapod na Bicol Express ta sa sobrang harang daa, garo na idtong nagraragobnob na tren haleng Bicol. Pati talinga mo mag'aaso-aso.

Ano an mga sangkap kaini? An mga rekado iyo an bawang, sibulyas, dikit na laya asin giniris na sili o lada'. An gulay pwedeng giniris na paro-pagolong o giniris na balatong. An bangot iyo an karneng orig na medyo pigpino man. An nataong siram iyo syempre an guta nin niyog.

[hirahón] Pag-adam asin pagluto

Enot, an niyog na kinodkod gumsaon sagkod na mapaluwas an guta. An enot na pagpuga' an naluwas iyo idtong lipotok na guta'. Ilaen sa sarong mangko. An ikaduwang pagpuga' pakatubigi naman syempre medyo lasaw nang guta'. Ini an enot na ikinakaag sa kawali.

Sunod ikaag an bawang, sibulyas, kadikit na laya. Dangan kun nagkakala'kaga' na, ikaag na an giniris na karneng orig. Kun malomoy na an karne, saka ikaag an balaw asin an giniris na lada'. Kun gusto mong maharang na maray di dagmangan mong katakottakot na sili. An balaw, bago ikaag palan pabulosan tubig sa sirnehan ngani mainaan nin askad pero dai pagpugaon ngani dai mawara an namit.

Pag ati na, saka ikaag idtong liputok na guta kasarabay na an giniris na paropagolong o giniris na balatong. Sa periodong ini dapat paluyahon na an kalayo (aloyooy na lang) ta pasiring na ini sa pag'onog. Halaton na maglana-lana. Paghinale' mo an lokdo, nanonoot pati' sa dungo an harang.

Alagad, saro lang ini kan bersyon kan Bicol Express. Sa ibang lugar sa Bicol, ini mayong kasalak na ano pa man na gulaygulay kundi sili o lada sana nanggad. Kaya inapod na gulay na lada' ta purong sili sana an mayor na sangkap.