Sinanglay
Halì sa Wikipedia
An SINANGLAY luto nin sira sa ginutaan. An pwedeng sanglayon iyo an tilapya, talusog. o puyo. An kaibahan kaini sa ibang mga ginutaan iyo ta sinosoksokan an tulak kan sira nin dakul na giniris na kamatis, bawang, sibulyas asin la'ya.
Pagluto. Badion ngona an mga sira. An paghilap bako sa tulak kundi sa may talodtod nya magpoon. Magguta' kan niyog. Sa pinakalipotok iramas an mga giniris na kamatis, la'ya, sibulyas asin bawang na inasinan sagkod na magnamit. Sa lambang binadi, isoksok an mga giniris tapos tiklopon saka patoson sa dahon natong. Bugkoson kan kinunit na dahon batag na linobloban ngani syempre dai magburuka.
An kaserola o kaldero talapitapan nin dahon natong o kan mga paklang sa irarom kaini ngarig dai matotong an linuluto. Ikaag na an mga binurugkos na mga sira sa kaserola. Ikaag naman an ikaduwang ginuta' abot o sayaw sa langkaw kan sinuruknong na sira. Kaagan giraray nin diit na asin sagkod na magnamit.
Kun gustong dakul an mga gulaygulay, ibabaw an abot sa sampolong dahon nin natong asin seguruhon na maguta' ngani manamit na maray an mga natong. Lutoon na sagkod na maglomoy.
