Potenciano Gregorio
Halì sa Wikipedia
Si Potenciano B. Gregorio, Sr. sarong Bikolanong musikero na bisto bilang kompositor kan Sarong Banggi.
Namundag siya kan Mayo 19, 1880 sa Santo Domingo, Albay (dating Lib-og). Sinda Narciso Gregorio asin Canuta Balladolid an saiyang mga magurang. Nagadan siya sa edad na 59 kan Pebrero 22, 1939 sa Honolulu asin piglubong sa La Loma Cemetery, Quezon City.
An agom niya iyo si Dominga Duran asin sinda nagkaigwa nin pitong aki- si Salvador, Victoria, Narcisa, Eriberto, Encarnacion, Monico, asin Potenciano, Jr.
An padabang apod saiya kan mga partidaryo "Lolo Poten", asin siya bantog na kompositor asin mas orog na bantog komo iyo an nagkompos kan kantang Bikolnon na Sarong Banggi na dakul an naghuhuna saro sanang awit-banwaan kan ronang Bikol. Kinompos niya an Sarong Banggi kan nag-eedad pa sana siyang 17 anyos kan taon 1897, taon na nagtugang grabi an bulkan Ma'yong.
Sinasabing saro siyang henyo sa pagbyolin asin nakanood siya sa musika sa pagtotokdo ni Padre Jorge Barlin kan ini cura paroco (1883-1885) sa Li-bog (Sto. Domingo na ngonyan). Kan siya nagrararom an adal sa musika, nagpoon na siyang magkompos para sa simbahan na sa saiya sanang paghingoa o sa tabang kan saiyang tugang na si Bernardo, na iyo an nag'organisar kan Banda de Li-bog.
Dangan siya na an nagkapot kan baton kan Banda sagkod na omabot an taon 1919 kun kasuarin nagin myembro siya kan Philippine Constabulary Band.
Sabi ni Hilario Balilo, dating alkalde kan Sto. Domingo asin namamayo kan Sto. Domingo Historical and Cultural Society na nag-osip saiya si Justo Gregorio kan ini edad 72 anyos kan taon 1962 na "si Uncle Poten niya daa pinagkompos an Sarong Banggi kan ini napamata sa pagkaturog na may nadangog na naghuhuning gamgam sa tahaw kan kiniskinis nin mga dahon" Sabi ni Balilo, enot na tinogtog an Sarong Banggi kan piyesta sa Guinobatan kan Agosto 15, 1910.
Alagad, sabi ni Resureccion Gregorio, saro sa makuapo sa tuhod ni Lolo Poten, kinompos daa an kantang ini kan taon 1897 kan an bulkan Ma'yong nagtuga asin napiritan an saindang pamilya na mag'ebakwet sa Barangay Salvacion asin duman napasabngan siya sa pagkompos sa tahaw kan ragobnob kan bulkan.
Pero, susog ki Merito Espinas, sarong parasurat sa kultura, kinompos ni Potin Gregorio an kantang ini kan Mayo 19, 1910.
May iba pa man siyang kinompos arog kan Pusong Tagob nin Sakit asin Hinoyop-hoyopp nin Dios alagad bakong gayo kabantog arog kan Sarong Banggi, sabi ni Resurreccion.
An orihinal na kopya kan komposisyon kan Sarong Banggi natomtom kan magkasulong lakopan sa Li-bog kan Enero 19, 1961. Sa kasulo' na idto, pati an kagduwa (12) pang mayor na mga kantang kinompos niya sa Bikol nakadamay huli ta an lumang harong kan mga Gregorio naradas man.
Si Col. Walter H. Loving, iyo saiya an nag-alok na maglaog sa Philippine Constabulary Band kan napangalas sa ipinakita niyang pambihirang abilidad sa musika. Enot tinogtog niya an Sarong Banggi sa banduria dangan sa pyano. Kan maisihan na siya mismo an nagkompos kan kantang ini asin huli man sa abang pasil niya magtogtog sa anoman na instrumento musikal, tolos inako siya ni Col. Loving sa banda.
An kantang ini parati itogtog kan Banda sa Luneta bago mag-guerra mundial na ika-2. Saro kuta siya sa pinadara sa Estados Unidos kan taon 1938 na maki-kompet sa Golden Gate International Exposition alagad kan siya sakay na sa S.S. President Pierce kinapotan siyang pneumonia. Idinalagan siya sa Fort Shafter Hospital sa Honolulu alagad binawian siya duman nin buhay dai sana naghaloy.
An saiyang restos nabalik man giraray sa saiyang sadiring banwa nin Li-bog (ngonyan Sto. Domingo) kan Mayo 19, 2005, sa ika-125ng anibersaryo kan saiyang pagkamundag.
Sarong estatuwa niya nakatindog man sa Camp General Simeon Ola Heritage Park bilang pagtaong onra kan saiyang estado. [1]
An kantang Sarong Banggi nagtao nin dakulang onra sa mga Bikolano ta napili ini na iyo an kantahon sa pagbukas kan Asamblea General kan United Nations duman sa Nueva York, E.U. kan Hunyo, 1951.
Ngonyan makangalas ta mas bantog na an kantang ini kisa an saiyang kompositor. Uya an mga taramon kaini;
SARONG BANGGI
- Sarung Banggi sa higdaan
- Nakadangog ako nin huni nin sarong gamgam
- Sa luba ko katurugan
- Bako kundi simong boses iyo palan.
- Dagos ako bangon si sakuyang mata binuklat
- Duman sa kadikluman ako nangalagkalag
- Aso mahiling ko duman sa itaas
- Simong lawog naheling ko maliwanag.
- Duman sa iraya bantog buayahan
- Naglangoy ako sa makuring pu'ngaw
- Dai ko pigheling an mga tentasyon
- Maheling ko lamang an si'mong lalawgon.
[2] Sinapian pa nin ibang datos: Merito Espinas- Legazpi Concert Program, Sept. 7, 1983.
