Kandingga
Halì sa Wikipedia
An KANDINGGA luto sa suka kan baga' asin katoy kan kanding. Sinasalakan ini parati kan giniris na paklang kan kangkong.
AN PAG-ANDAM
Enot maggisa nin bawang, sibulyas, paminta na kaagan na nin bitsen. Kun sarong kilong baga' asin katoy, an proporsyon kaiyan saro kaapatan (1/4) na suka man an ikaag asin kabanga' na tawyo. An takadan iyo an ordinaryong kap. Sa suka asin tawyo iraramas na maray an giniling na baga' asin katoy.
Dangan, ikaag na sa kawali an pinagramas duman sa kawali na may ginisang sebulyas asin bawang. Kun yaon na sa katahawan kan pagluto kaini saka naman ikaag an giniris na mga paklang nin kangkong. Dai pwedeng idungan an kangkong sa pagkaag kan giniling na baga ta malulu'nok an mga paklang. Halaton na maglomoy.
Dakul nagsasabi na inapod ining kandingga ta mayormente baga' sana kan kanding an dapat ginagamit igdi. Pero posible natongod sana na an pangaran garo nakaagid sa taramon na kanding. An totoo uso man na lutoon na kandingga an baga asin katoy kan orig.
