Cristóbal Colón
De Uiquipedia
Cristóbal Colón (1451- 20 de mayu de 1506). Marineru posiblemente ñacíu en Xénova (anque dellos hestoriadores dicen que yera del Reinu d'Aragón, el Reinu de Galicia o el Reinu de Portugal entre otros) que, al serviciu de la corona del Reinu de Castiella, alcontró una ruta segura -dende occidente- a América pa España (hasta entós desconocida o non documentada) el 12 d'ochobre de 1492.
La hestoria más espardía del viaxe ye la de que Cristóbal Colón taba convencíu d'algamar les costes del llonxanu oriente (les Indies) viaxando a la escontra, pal oeste, y que yera posible facer el viaxe pola mar con posibilidaes d'éxitu. D'aquella namás se conocía esi camín rodeando África, y esa yera una vía embaxu'l control de Portugal, que nun dexaba pasar a naves que nun foren propies. La forma reonda de la Tierra yera bien conocida na época, anque polo visto la teoría de Colón al rodiu de que pudiera facese'l viaxe basabase en cálculos fallíos al rodiu'l tamañu del planeta, qu'indicaben que yera más pequeña de lo que ye en realidá.
Otres teoríes dicen que Colón tuviere conociecia d'un continente nuevu por lleendes escuchaes en países nórdicos, escomencipiando la tarea de topalu pa la su conquista.
Lo que ye seguro ye que Colón amás de topar el nuevu continente, tornó a Europa y llueu a América hasta cuatro vegaes, faciendo una serie de viaxes periódicos con seguridá dende Europa hasta América, ensin saber nunca que los viaxes taben faciéndose a un continente nuevu, y non a unu vieyu. Anque se conoz que los Vikingos llegaren a América al rodiu del sieglu XI, ye a partir de los viaxes de Colón y otros exploradores que lu sucedieren cuando s'establecieron vínculos permanentes, reclamando pa sí les potencies imperiales europees el territoriu americanu. Amás entamóse l'intercambiu entre ambos continentes de productos como la patata, el tomate, el maíz y los caballos.
Nel so primer viaxe topó la islla de San Salvador (o Guanahaní como yera nomada polos ñatívos) depués de dos meses de travesía, visitando depués Cuba y La Española. Volvió a España siete meses depués de cuando marchara. Nel so viaxe caberu namás tardó un mes y cuatro díes en dar coles costes d'América.
Los llogros de Cristobal Colón nesa dómina compárense a los viaxes a la Lluna fechos nel sieglu XX.
La República de Colombia tien el so nome n'homenaxe a Colón.
