Christopher Columbus

Mula sa Tagalog Wikipedia, ang malayang ensiklopedya.

Si Christopher Columbus (1451 - Mayo 20, 1506) (Cristòfor Colom sa Catalan, Cristoforo Colombo sa Italyano, Cristóbal Colón sa Kastila, Cristóvão Colombo sa Portuges) ay pinaniniwalaang mula sa Genoa, bagaman pinaniniwalaan din na mula siya sa ibang lugar, mula sa Imperyo ng Aragon o sa mga Kaharian ng Galicia o Portugal. Isa siyang eksplorador at mangangalakal na tinawid ang Karagatang Atlantiko at nakarating sa Amerika noong Oktubre 12, 1492 sa ilalim ng watawat ng Espanya. Naniwala siyang ang daigdig ay isa lamang maliit na bilog, at tinaya na ang isang barko ay makakarating sa Malayong Silangan kung tatahakin ang pakanlurang direksyon.

Ang malawakang paniniwala na kinalaban ni Columbus ang ideya na ang daigdig ay patag ay isa lamang kathang isip ni Washington Irving. Sa katotohanan, maraming nang tao noong panahon niya ang naniniwalang bilog ang mundo. Ngunit ang tunay na debate ay kung maaari nga bang maglayag palibot sa buong mundo nang hindi nauubusan ng rasyong pagkain o maligaw sa mga lugar na walang hangin. Bagaman hindi siya ang unang nakarating sa Amerika, ang kanyang eksplorasyon ang nagtatag ng matibay na ugnayan sa pagitan ng mga Luma at Bagong Mundo.