Schneeburg
Us der alemannische Wikipedia, der freie Dialäkt-Enzyklopedy
 |
Dialäkt: Markgräflerisch (Ebringe) |
D' Schneeburg isch e Ruine, wo sich uf 516 m Höchi uf em Schneeberg, em westliche Näbegipfel vum Schimberg uf dr Gmarkig vu Ebringe zwische Ebringe un Uffhuse im Stadtteil Sant Jörge vu Friburg im Brisgau befindet.
Die äldist erhalde Erwähnig vu dr vu dr Herre vu Hornberg erbaute Burg datiert uf anno 1312. Anno 1349 het dr Werner von Hornberg d'Burg in d'Lahenshoheit vum Chloster Sankt Galle ybergä un isch defir mit dr Herrschaft Ebringe belähnt worre.
D'Burg isch scho vor 1500 verlosse worre, womit e Zerstörig im Burechrieg 1525 eher ins Riich vu dr Legende ghört. Die domols yber Ebringe herrschende Herre vu von Falkenstei hän ihr Residenz in dr Ort Ebringe verlegt un s' Ebringer Schloss - s'hütig Rothus - baut, wo um 1710 si hütigi Gstalt erhalde het.
Hüt isch vu dr Burg numme e chleineri, deilwiis rekonstruierti Ruine mit Reste vum Bergfrid un eme Wohngebäude erhalde.
Inzwische het d'Gmei Ebringe einigi Baim vor dr Burg gfällt, so dass si inzwische ganzjährig guet vu Ebringe un dr Rhiebeni us im Wald z'sähe isch.
| Koordinate: 47° 57' 38" n. Br., 7° 47' 53" ö. L. |
