Hector Petersen
vanuit Wikipedia, die vrye ensiklopedie.
Hector Pieterson (1964 – 16 Junie 1976) het die Soweto-opstand van 1976 teen Apartheid verbeeld nadat 'n foto, geneem deur Sam Mzima, van die sterwende Hector wat deur 'n medestudent gedra word dwarsoor die wêreld gepubliseer is. Hy is op 12-jarige ouderdom doodgeskiet toe die polisie begin vuur het op betogende studente. Vir jare was 16 Junie (vandag Jeugdag, 'n openbare vakansiedag in SA) een van die mees simboliese dae van die stryd teen Apartheid.
Daar bestaan 'n algemene opvatting dat Hector die eerste kind was wat op daardie dag geskiet is, maar eintlik was dit Hastings Ndlovu maar sý dood is deur geen fotograaf op film vasgelê nie en hy het nooit baie bekend geword nie. Toe Hector geskiet is en neerval op die hoek van Moema- en Vilakazistraat, is hy opgetel deur Mbuyisa Makhubo (toe 18jaar oud), 'n medeskolier, wat saam met Hector se suster Antoinette (toe 17) in die rigting van Mzima se motor gehardloop het, waarmee hy na 'n nabygeleë kliniek geneeem is waar hy dood verklaar is. Heide Mbuyisa en Mzima is na die tyd deur die polisie geteister en moes onderduik. Mbuyisa se moeder het die Waarheids- en Versoeningskomissie vertel dat sy 1978 'n brief van Mbuyisa uit Nigerië ontvang het maar sedertdien niks van hom gehoor het nie. Beide Hector Pieterson en Hastings Ndlovu lê begrawe in die Avalon-begrafplaas in Soweto.
[wysig] Pitso of Petersen of Pieterson
Sedert Junie 1976, word Hector se van Petersen gespel in die pers maar die familie dring daarop aan dat die korrekte spelling Pieterson is. Die Pieterson-familie het oorsponklik Pitso geheet maar het 'n Afrikaanse van aangeneem in 'n poging om as "Kleurling" deur te gaan.
[wysig] Hector Pieterson-museum
Die Hector Pieterson-museum het op 16 Junie 2002 die eerste museum geword om in Soweto oop te maak. Dit huisves alle inligting oor die gebeure wat gelei het tot die Soweto-opstand. Dié museum kan aangetref word in Kumalostraat, Orlando-Wes in Soweto. Antoinette Pieterson werk as gids by die museum.
