Gé Korsten
vanuit Wikipedia, die vrye ensiklopedie.
Gerhard Korsten (Geb. 6 Desember 1927 - † 29 September 1999) was 'n Suid-Afrikaanse sanger wat 'n diep stempel op die Afrikaanse kultuur afgedruk het. Vandag nog word sy lied, liefling by Rugbywedstryde in Bloemfontein en Pretoria gespeel. Hy is as die jongste van agt kinders gebore in Rotterdam, Holland en het as 9-jarige seun saam met sy ouers na Suid-Afrika geëmigreer. Hy het sy loopbaan as operasanger begin en was reeds op 20-jarige ouderdom lid van die SAUK se kore. Hy het in 1952 stemopleiding ontvang by die South African College of Music in Kaapstad onder leiding van Adelheid Armhold.
In 1955 het hy na Pretoria verhuis waar hy verdere opleiding onder leiding van Albrecht Lewald ontvang het. Hy was in dieselfde jaar dan ook een van die stigterslede van die Pretoria Operagroep. Sy opera debuut maak hy in 1956 as "Canio" in "I Paliacci". In 1962 word 'n oorsese studiebeurs aan hom toegeken waarna hy in Europa in 1963 onder Judith Hellwig verdere opleiding ontvang en ook die geleentheid kry om in operas in Europese stede soos Weenen en München op te tree. Hy het vir 'n tyd lank ook in Pretoria 'n elektriese kontrakonderneming besit, maar het sy belang in die onderneming in 1970 verkoop om sy tyd voltyds aan musiek toe te wy. In 1976 het hy die Nederburgprys vir Opera ontvang vir sy hoofrol in Andrea Chénier.
Gé Korsten het in 1965 sy betrokkenheid met ligte musiek begin toe hy sy eerste langspeelplaat "Gé Korsten Sing Uit Die Hart" uitgereik het. In 1966 het hy nog vier langspeelplate uitgereik. Sy rolprentdebuut maak hy in 1967 in "Kruger Miljoene". Later die jaar vertolk hy ook die hoofrol in die baie gewilde fliek, "Hoor My Lied" met Min Shaw en Lindie Roux. Die klankbaan vir hierdie fliek het aan Gé Korsten dan ook 'n goue plaat besorg. Drie ander films het gevolg:
- "Lied In My Hart" met Mitsi Stander en Min Shaw en Nellie du Toit as gassterre (1969)
- "A New Life" saam met Leonore Veenemans (1970)
- "Lokval in Venesië" met Dianne Ridler (1972)
Korsten het 'n totaal van nege goue plate op sy kerfstok gehad. In totaal het hy 58 albums tydens sy loopbaan wat oor 40 jaar gestrek het opgeneem. Hy het ses SARIE toekennings ontvang en in 1979 'n ARTES toekenning vir sy TV program "Gé Sing". Hy het ook die rol van Walt Vorster in die sepie, Egoli gespeel. In 1985 is hy as hoofdirekteur van KRUIK in Kaapstad aangestel en het die pos tot in 1989 beklee. In 1999 het hy selfmoord gepleeg en het vermoedelik aan kanker gely. Hy was met Elna Burger getroud en het vyf kinders gehad.
[wysig] Bronne en verwysings
- Inligtingsbaadjie ingesluit by Gedenkalbum getiteld "Ter Nagedagtenis aan Gé Korsten - Die 25 Grootste Treffers. " in 1999 deur Scorpio music vrygestel.
- Artikel oor Korsten se dood
- Werf oor Gé Korsten met Fotos en klanklêers
