紙紮祭品
出自維基百科，自由嘅百科全書
紙紮祭品，係用嚟燒俾已經仙遊咗人去陰間用嘅紙祭品。陰間用嘅陰司紙金銀衣紙及壽衣……等，統稱為冥鏹。
紙紮祭品通常係要用到藤枝，將佢紮成物品嘅外殼形狀，然後用唔同需要而剪裁出嚟嘅油紙，填舖喺藤枝與藤枝之間，等佢喺外觀上望落去與實際物品相似。因為藤枝可以任意扭曲，可以隨意造型，所以紮作祭品嘅種類可謂包羅萬有，好似有可以俾先人享用嘅紙紮大屋、傭人……等等；隨著時代嘅進步同埋娛樂嘅「需要」，甚至有真係有哂144隻紙造嘅麻雀牌、天九、唔同型號嘅手提電話、遊戲機、手提電腦……等，仲可以訂造汽車、遊船、飛機、電視、音響器材哩啲大型少少嘅紙紮祭品俾先人享用。香港已故著名歌影藝人梅艷芳出殯嘅時候，佢嘅徒弟們更特登訂造咗一個紙紮嘅大舞台，足足有成張乒乓波檯咁大，等佢哋嘅師父可以喺另一世界都可以開吓演唱會，過吓表演癮。又如馬壇名宿董驃過身，親友特登訂造一個馬場比佢繼續策馬揚鞭。
紙紮祭品亦都係要通過燃燒先至可以傳到先人手上。（可以參考冥鏹）
因為每種唔同嘅祭品，佢嘅製造過程都唔同，有好多紙紮嘅祭品仲要用到好高手工去整，所以價錢亦都有所唔同；當然越係大型同複雜嘅紙紮祭品，佢嘅價錢一定會更加高。
小型嘅紙紮品可以喺一般嘅香燭用品店（俗稱紙紮舖）買到，至於一啲大型而且複雜嘅紮作祭品，就要搵識得哩門手工藝嘅師傅或者舖頭訂造。
