Pårticipe prezintrece
Èn årtike di Wikipedia.
On pårticipe prezintrece u pårticipe prezint (onk des deus sôres di pårticipes), c' est on codjowa do viebe, sins djin, sins djinre, ki mostere on duraedje di l' accion.
Li cawete do pårticipe prezintrece, e walon, c' est todi -ant, po tolminme kéne troke di viebes.
Li pårticipe prezintrece pout esse eployî come addjectif. Adon, i prind on djinre omrin (cawete -ant) u femrin (-ante). Cisse sôre d' addjectif la est pus voltî metowe divant l' no.
Ces addjectifs la polnut esse åjheymint sustantivés.
[candjî] Uzaedje e walon
L' uzaedje des pårticipes prezintreces est foirt diferin e walon ey e francès.
[candjî] Eployaedje tot seu
Dins l' cåzaedje walon corant, on n' l' eploye nén voltî tot seu (c' est rsintou come on francijha):
- on diccionaire dinant li sinse des mots ==> on diccionaire ki dene li sinse des mots.
Nerén, dins les Belès letes, a cåze di l' assaetchance do francès, on l' rescontere cobén tot seu.
[candjî] Eployaedje e djerondif
Dizo uzaedje di djerondif, on l' eploye avou tot u avou e, u avou etot.
- Tot passant pa Nåwinne, dj' a stî vey li Fornea Sint Mitchî.
- E m' aprestant, tot m' raezant, dji m' a tot kernaxhî.
- Etot rotant dins les bwès, Amand s' sinteut raviker (a l' après d' J. Calozet).
