Fraide
From Wikipedia
Fraide i nambafaiv de bilong wik.
Long sampela kantri (olsem Amerika na Inglan), wik i stat long Sande, na Fraide i nambasikis de bilong wik.
Nem Fraide i kam long Tok Inglis Friday. Bipo bipo tru, dispela i min Frige’s Day, o de bilong masalai, o got, ol i kolim Frige. Em i masalai meri bilong pasin laikim, long dispela taim.
Sapos yumi i gat wok stat Mande i go inap Fraide na yumi i no gat wok long Sarere na Sande, orait Fraide em i de bihain tru long taim wok. Planti man o meri i hamamas long nait bilong Fride bikos ol i no mas i go long wok inap long Mande.
Long Islam, o lotu bilong ol Mahomet, Fraide i de bilong lotuim insait long haus lotu. Long sampela kantri bilong Islam, olsem Iran na Afganistan, wik i stat long Sarere, na i pinis long Fraide.
Long Judaisim, o lotu bilong ol Juda, Sabat, o de bilong lotuim, em i stat long Fraide long taim san i pundaun, na i pinis long taim san i pundaun long Sarere.
Long sampela sosaiti, olsem Yurop na Amerika, sampela man o meri i tingting olsem, sapos de namba 13 bilong mun i Fraide, em i min olsem kas nogut. Tasol, arapela man o meri ol i tingting, dispela tingting em i supastisen, o tingting giaman bilong taim bipo tru.
| Wik |
| Mande | Tunde | Trinde | Fonde | Fraide | Sarere | Sande |
