Antonellu di Missina

From Wikipedia

Artìculu dâ seria Pittura

Argumenti

Pittura · Pittura taliani Quatri · Musei

Catigurìi

Arti · Pittura (artisti) ·

Antonellu di Giovanni d'Antoniu, chiamatu Antonellu di Missina (Missina 1430 circa - 1479), pitturi. Funni la cultura fiamminga e la cultura prospètticu-munumintali italiana. Lu sò viaggiu a Venezia è dicisivu pi Giovanni Bellini e la succissiva arti italiana.

[cancia] Biografìa

Nasci ntô 1430 circa a Missina, di Giovanni, scalpillinu. Si mparau l'arti probabbilmenti tra Missina e Palermu. Dû 1445 ô 1455 è a Napuli unni, secunnu a na tistimunianza, ntâ putìa dû pitturi Colantoniu, veni a cuntattu cu la pittura fiamminga, spagnola e pruvinzali.

A Antonellu veni attribbuita l' Annunciata, sarbata ntê Musei Cìvici di Comu, chi si rifà pi lu stili e cunugrafìa a l'ambienti napulitanu di gustu fiammingu e deci tavuleddi cu Biati franciscani rializzati pi la pala dipinta di Colantoniu pi la chiesia di San Lorenzu Maggiori.

La cusidditta Crucifissioni di Sibiu dû 1455 circa, sarbata ô Muzeul de Artà di Bucarest, icunugraficamenti riprenni li Calvari fiamminghi. Dû stissu annu ma succissiva è la Crucifissioni di Anversa, sarbata ô Musée Royal de Beaux Arts: nta parti vascia dâ tàvula, l'òpira è prittamenti fiamminga mentri ntâ parti àuta, si vidi la canuscenza dû spazziu di l'arti italiana.

Dû 1457 è la prima cummissioni comu mastru: un gunfaluni pi na cunfratirnità di Reggiu Calabbria. Dû 1460 ô 1465 si trova a Missina. Ntô 1460 circa ci veni attribbuita l'esecuzzioni dâ cusidditta Madonna Salting, unni si vìdunu puru l'influssi di l'òpira di Piero della Francesca. Li dui tavuleddi di Reggiu Calabbria Abramo servito dagli angeli e San Girolamo penitente sunnu dû periudu doppu lu 1460.

Tra lu 1465 e lu 1470 circa rializza lu Ritrattu d'omu dû Museu Mandralisca di Cefalù. Ntê ritratti Antonello, a diffirenza di àutri italiani, chi utilizzàvanu la posa di prufilu, adotta la pusizzioni a tri quarti, tipicamenti fiamminga, chi pirmetti n'anàlisi fìsica e psiculòggica cchiù minuta.

Lu schema cumpusitivu di stu ritrattu veni pigghiatu sempri ntê ritratti succissivi: lu pirsunaggiu è nsiritu nta nu sfunnu scuru cu lu bustu tagghiatu sutta li spaddi, testa furriata versu destra mentri l'occhi, ô cuntrariu, sunnu fissi supra chiddi dû spittaturi, la luci illùmina lu latu destru dâ facci mentri lu latu mancinu è nta l'ùmmura. Ntê ritratti succissivi metti sempri nu zòcculu di màrmuru di sutta cu nu cartidduzzu pittiatu câ firma e la data.

Ntô 1470 circa è a Venezzia unni veni in cuntattu cu la pittura di Giovanni Bellini. Lu Salvador Mundi è la sò prima òpira firmata e datata: Mille simo quatricentessimo sexstage/simo quinto viije Indi antonellus/messaneus me pinxi, ma cchiù probabilmenti lu fici ntô 1470.

Turnatu in Sicilia rializza lu Politticu di san Gregoriu. Dû 1474 è l'Annunciazione dû Museu Bellomu di Sarausa, unni lu spazziu nun è unificatu dâ pruspittiva, ma di na fina graduazzioni di luci.

Dû stissu annu è lu San Girolamu ntô studiu, sarbatu â National Gallery di Londra.

Ntô 1475 accuminza l'àutru piriudu vinizzianu nzina a l'autunnu dû 1476. Studia la fiura umana sia pi quantu riguarda l'anatumìa chi la espressivitati, dirivati di la spirienza belliniana e pierfrancescana.

Dû 1475 è l'Ecci Homo dû Collegiu Alberoni di Piacenza firmatu e datatu: 1473 Antonellus Messaneus me pinxit.

Dû stissu annu sunnu: La Crucifissioni dâ National Gallery di Londra, firmata e datata: 1475/antonellus messaneus/me pinxit; lu Ritrattu d'uomunu dâ National Gallery di Londra; la Pietà dû Museu Correr; lu Ritrattu d'uomunu, chiamatu Lu Cunnuttieru dû Louvre; lu Ritrattu d'uomunu dâ Gallirìa Borghesi e la Madonna col Bambino dâ National Gallery di Washington.

Tra lu 1475 e lu 1476 pittìa la Pala di san Cassiano ora a Vienna, òpira mutilata di cui rèstunu la Vèrgini supra lu tronu e quattru santi a mezzu bustu.

Tra lu 1475 e lu 1478 pittìa la Pietà dû Museo del Prado. Dû 1476 circa è lu San Sebastianu di Dresda.

Tra lu 1476 e lu 1478 fa lu Cristu â culonna dû Louvre. Doppu ca riturnau in Sicilia, rializza ntô 1476 l'Annunziata di Palermu cugghiuta ntô mumentu ca l'àncilu si nni jiu. Murìu a Missina ntô 1479.

Nta Commons s'attròvanu àutri mmàggini rilativi a Antonellu di Missina.