Ortografia di papiamentu
Di Wikipedia, e ensiklopedia liber
- E artíkulo aki ta skibí na papiamentu. Lo ta apresiá si por mantené e artíkulo aki na estilo di papiamentu.
Ortografia di papiamentu (òf papiamento na Aruba, papiamentu na Boneiru i Korsou) ta enserá e reglanan di puntuashon i di skibi e idioma. E otrografia di papiamentu ta varia un tiki entre esun uzá den Antias Hulandes, ku tabata disidí pa e gobièrnu di Kòrsou desde aña 1976, i esun uzá na Aruba. Algun diferensia grandi entre esun di Antias i esun di Aruba ta e preferensia di pronunsiashon di algun lèter i kon ta skibi sierto palabra en general. Mihó bisá, e preferensia di tin reglanan fonétiko òf etimológiko. Un diferensia di e idioma mes ta e preferensia di uzo di algun palabra riba otro.
Kontenido |
[editá] Alfabèt
| A | J (ye) | S (ès) |
| B (be) | K (ka) | T (te) |
| C (se) | L (èl) | U |
| D (de) | M (èm) | V (ve) |
| E | N (èn) | W (we) |
| F (èf) | O | X (eks) |
| G (ge) | P (pe) | Y (igrèk) |
| H (ha) | Q (kü) | Z (zèt) |
| I | R (èr) |
Di e lèternan aki, por modifiká kuater vokal: è, ò, ù i ü.
ñ ta e úniko konsonante ku por modifiká i su nòmber ta eñe.
Ku e lèternan aki tin kuater dígrafo tambe. Esakinan ta ch, sh, dj i zj.
Tur e vokalnan menshoná tin un zonido so, ku eksepshon di e, ku por tin e zonido di shua (ə). Ehèmpel: "tres" vs. "mangel".
[editá] Sierto konsonante segun reglanan di Antias
Segun reglanan di Antias, tin sierto kaso ora ta huza e konsonantenan c, j, q i x. Esakinan ta:
- Solamente den kombinashon ku otro konsonante, manera ch, dj, èts.
- Den matemátika, kímika, èts.
- Den nòmbernan propio: Carlos, Jacob, Quincy, Xavier
- Esaki no ta inkluí nòmbernan di kariño adaptá di esaki
- Den nòmbernan geográfiko
- Palabranan fiá i adaptá di otro idioma
[editá] Vokal, diptongo i triptongo
Ora ta skibi palabranan, partikularmente palabranan fiá di hulandes, no ta skibi vokal dòbel, a menos ku ta tende dos vokal den pronunsiashon. Ta nifiká ku, por ehèmpel, no ta skibi "spaar", pero "spar". Algun ehèmpel di palabranan ku si por: oochi, reeduká, koopera, kreensia. Tambe no ta sigui e regla hulandes di pone trema (¨) pa distinguí entre e dos vokalnan.
Den papiamentu por haña varios kombinashon di vokal, òf diptongo. Esaki ta un lista di nan tur:
| ai | gai | baiskel |
| ei | meimei | esei |
| ei1 | rei | preis |
| eu | leu | pareu |
| oi | roi | morkoi |
| òi | bòikòt | bòlpòint |
| ou2 | outo | Kòrsou |
| ui | kuida | ruina |
| ùi | brùin | flùit |
| ia | papia | biaha |
| ie | fiel | dies |
| io | odio | avion |
| iu | friu | hudiu |
| ua | kuater | suave |
| ue | nuebe | fuerte |
| uo | kuota | kontinuo |
- Esaki ta un eksepshon di e regla di aksènt grave. Tin hopi palabra ku e diptongo èi i pa redusí signonan ortográfiko na un minimo, a disidi ku ta skibi e diptongo aki sin aksènt.
- Esaki tambe ta un eksepshon di aksènt grave. Tin hopi palabra ku tin e diptongo òu i aki tambe tin ku redusí signonan ortográfiko den tekstonan. Tambe e diptongo au no ta korekto. Por ehèmpel, e palabra mester ta outo, no auto.
[editá] Algun regla di vokal i diptongo
- No ta kuminsá ningun palabra ni ningun sílaba ku diptongo ku ta kuminsá ku i òf u. Na luga di esaki ta huza y i w.
- Ehèmpel: yabi, wowo.
- No ta skibi e konsonante y entre e vokal i i un otro vokal.
- Ehèmpel: antiano, no antiyano.
- No ta skibi e konsonante w entre e vokal u i un otro vokal.
- Ehèmpel: yuana, no yuwana.
[editá] Triptongo
Triptongo ta kombinashon di tres vokal. Aki ta lista nan tur:
| iau | miau |
| ieu | bieu |
| iou | bakiou |
| uai | zuai |
| uei1 | zuei |
- Pa limitá aksènt, no ta pone aksènt grave riba e di e triptongo uei, ounke ta pronunsiá un è.
[editá] Konsonante
| b | c | d | f | g | h | j | k | l | m | n |
| ñ | p | q | r | s | t | v | w | x | y | z |
Segun e reglanan di papiamentu di Antias, e konsonantenan vet tin algun regla i eksepshon.
- Mantené e sílabanan inisial ab-, ob-, sub- i ad- solamente kaminda e konsonantenan b i d ta zona asina.
- abreviá, pero apstene
- obligá, pero ophetivo
- Pa haña e zonido sonoro di g dilanti e, è òf i, mester interkalá un u.
- guera, no gera
- sigui, no sigi
E regla no ta aplikabel ora ta pronunsiá un shua.- sanger
- mangel
Ademas no ta skibi ningun konsonante dòbel. E uniko eksepshon ta ora ta hasi palabra plural i ta pega nan na e palabra. Ehèmpel: pannan, sènnan.
[editá] Aksènt
Normalmente, na papiamentu e énfasis di un palabra ta kai semper riba e último sílaba di un palabra ku ta kaba ku konsonante, òf riba e penúltimo sílaba di un palabra ku ta kaba ku vokal. Naturalmente tin eksepshon i pa nota esakinan na papiamentu ta huza dos tipo di aksènt: aksènt grave i aksènt skèrpi. Pa palabranan ku aksènt grave no tin regla spesial. Pa huzo di aksènt skèrpi, tin algun regla.
Ta pone aksènt skèrpi riba tur palabra polisilábiko:
- Unda e énfasis ta kai riba e último sílaba, i e palabra ta kaba ku un vokal:
- piská
- informá
- kachó
- Unda e énfasis ta kai riba e penúltimo sílaba, i e palabra ta kaba ku un konsonante:
- fásil
- hóben
- miéntras
Esaki no ta inkluí palabra ku ta kaba ku un shua siguí pa un konsonante:- mangel
- amandel
- koper
- Unda e énfasis ta kai kualke otro kaminda ku no ta último òf penúltimo:
- sílaba
- sientífiko
- áwaseru
Aksènt no ta kambia ku palabranan ku ta terminá ku e sufihonan mente òf nan. Si nan tabata tin un aksènt, e ta keda, si no tabata tin, no ta pone un aserka.
Algun ehèmpel:
- íntimo ta bira íntimamente
- fásil ta bira fásilmente
- piská ta bira piskánan
- regla ta bira reglanan
[editá] Eksepshon
- Si e sílaba ku énfasis mester risibí un aksènt grave i un aksènt skèrpi, no ta pone aksènt skèrpi riba e sílaba.
- No ta pone aksènt skèrpi riba palabranan unda e énfasis ta kai riba e último sílaba, i ta kaba ku un diptongo dekresiente òf un triptongo.
- kabai
- Kòrsou
- Tambe pa redusí huzo di signo ortográfiko, no ta pone aksènt skèrpi riba tabata ku tabatin.
- No ta nesesario pa pone aksènt riba lèter kapital.
- Último i Ultimo ta korekto
[editá] Lèternan kapital
Ta skibi ku lèter kapital:
- E promé lèter na prinsipio di un teksto
- E promé lèter na prinsipio di un frase, esta semper despues di un punto ( . ), un signo di interogashon ( ? ), òf di ekslamashon ( ! )
- E promé lèter di nòmbernan propio di un persona, animal òf opheto
Nòmber di deidat i di personanan divino i nòmber geográfiko ku ta pertenesé na e grupo aki; "San" i "Santa" dilanti un nòmber tambe - Títulonan òf nòmbernan di dignidat manera
- Sumo Pontífise
- Su Mahestat
- Palabranan prinsipal den títulonan i epígrafenan
No ta skibi ku lèter kapital:
- Nòmber di dianan i lunanan
- djaluna
- aprel
- Nòmber ku ta deriva di nòmbernan geográfiko (sustantivo i athetivo)
- un arubano
- un buki hulandes
- Idiomanan
- papiamentu
- indones
[editá] Kontrakshon
E huzo di kontrakshon na papiamentu ta hopi komun, partikularmente ora ta papiá. Ta rekomendabel ku ta evitá mas tantu posibel e huzo di kontrakshon den teksto. Den kaso ku mester skibi palabranan ku kontrakshon, ta huza un apóstrofe kaminda tin elishon di un òf mas lèter.
- Algun ehèmpel di elishon di un lèter:
- ta asina - t'asina
- no ta asina - n' t'asina
- yuda e - yud'é
- Algun ehèmpel di huzo di apóstrofe sin espasio entre e apóstrofe i e lèter su dilanti i esun despues:
- kashi di glas - kash'i glas
- kos di hari - ko'i hari
- bleki di lechi - blek'i lechi
Aki tin elishon di e último lèter di e promé palabra i e promé lèter di e di dos palabra.
- Algun ehèmpel di huzo di apóstrofe ku espasio entre e palabra dilanti e apóstrofe i e apóstrofe:
- brel di solo - brel 'i solo
- stèm di kanta - stèm 'i kanta
- bòter di biña - bòter 'i biña
Aki tin elishon di e e promé lèter di e di dos palabra so.
- Ta hopi komun pa huza kontrakshon ku e pronòmbernan personal ami, abo i e. Por huza kontrakshon aki, pero ta preferibel ku ta skibi nan lòs di e verbo su dilanti:
- duna ami - duna mi, duna'mi
- duna abo - duna bo, duna'bo
- duna e - dun'é
