Marcela Delpastre

Un article de Wikipèdia, l'enciclopèdia liura.

Marcela Delpastre es n'autora lemosina de lenga occitana mai francesa.

[Modificar] Bocins de vita

Marcela Delpastre es nascuda lo 2 de feurier 1925 a Germont sus la comuna de Chamberet en Corresa. Filha, pita filha, reira pita-filha de paisans lemosins, 'la naisset au cuer de la civilizacion paisana lemosina. Chas ela auviguet e aprenguet doas lengas, l'occitan mai lo francés. Fuguet escoliera a Surdòu e a Sent Liunard (Vinhana Nauta) puei anet au collegi de Briva (Corresa) ente aguet un baccalaureat filosofia-literatura. Puei faguet un passatge a l'Escòla daus Arts decoratius d'a Limòtges. Se passionet per las fòrmas umanas (los visatges, las corbas femininas..) e a l’estetica en generau.

En 1945 tornet viure a Germont, dins la ferma familiala, ente faguet tota sa vita la paisana (trabalh que fasia « perque folia ben minjar »). Tot en trabalhant, que ‘la sia jutant (molzant) las vachas o que ‘la sia sus son pelador (tractor), se plantava pas de calcular quauquas rimas, de pensar a quauques poemis. La poesia l’acompanhava tota la jornada, e avia totjorn dins la pòcha un pitit quasern e un creion ; Quand l’inspiracion venia, quand los verses eran ‘qui, ‘ribats braves dins sa testa, la Marcela plantava sa besunha e se metava d’escriure. Podam pensar que ‘na bona part de sos chap-d’òbras son nascuts sus ‘na bala de palha dins l’estable o a la broa d’un prat.

A la fin de las annadas 40 e a la debuta de las annadas 50, alora que los quaserns de poemas e de nòtas començavan de s’apilar, Marcela Delpastre envoiet daus textes per quauquas revistas e antologias de poesia. Fau dire que quauqu’unas de sas correspondancias literarias li encorajavan. De pitas publicacions en pitas participacions, ‘la se faguet coneisser mai apreciar dau monde « letrat » dau Lemosin.

A la debuta de las annadas 60, la Marcela veiguet s’apreimar la mòrt de son pitit vilatge de Germont e constatet emb dolor la mòrt de tota la civilizacion paisana tradicionala e milenaria dau Lemosin. Los tractors remplaçavan los buòus, las machinas las mans, las televisions las velhadas…Marcela comencet de s’interessar vertadierament aus contes, dires e tradicions de son pais, e faguet rencontra dau Robert Joudoux (de la revista Lemouzi) e dau Jean Mouzat (autor occitan lemosin).

La prumiera òbra en occitan de la Marcela Delpastre fuguet La lenga que tant me platz : E si m’aproisme a la senta taula, voldria ‘na òstia de pan de blat—per comuniar tot per lo còp emb lo bon Dieu e emb la terra—ensemble belament ‘semblats –coma l’alen a la saba daus blats—dins la lenga que tant me platz. A partir de queu moment, Marcela Delpastre decidet d’escriure en lemosin, dau Lemosin e sus lo Lemosin. Publiguet dins la revista sus-citada quauques poemas permieg los quaus Lo Rossinhòl e l’Eglantina e Lo chamin de terra. Per escriure mai aisament, aprenguet la grafia normalizada occitana.

Au mieg de las annadas 60, la Marcela se metet de collectar e de tornar inventar daus contes tradicionaus lemosins. Lo prumier recuelh fuguet publiat en 1970 jos lo titre Los contes dau Pueg Gerjant. Parallelament ‘la comencet de far òbra d’etnològa de son pais emb Le tombeau des ancêtres : coutumes et croyances autour des fêtes religieuses et des cultes locaux. En 1968 fuguet publiat La vinha dins l’òrt, poema primat au concors Jaufre Rudel. Sa version francesa (La vigne dans le jardin) fuguet mesa en teatre en 1969 per la tropa de Radio-Limoges, tropa que montara dins las annadas 70 d’autres textes de Delpastre (L’Homme éclaté, La Marche à l’étoile). Marcela Delpastre contunhet d’escriure daus poemas, nonmas quauques d’entre ilhs fugueren publiats a l’epòca dins las revistas Lemouzi, Traces, Poésie 1, Vent Terral, Oc…

En 1974 Los Saumes pagans surtigueren dins la colleccion Messatges de l’IEO. Qu’es queu recuelh de poemas que la faguet vertadierament coneisser de tot lo monde literari occitan. Dins Le Bourgeois et le paysan, Delpastre contunha d’estudiar las costumas, los creires e la tradicion orala de son pais lemosin, ‘quela vetz sus lo teme dau fuec. Mai tard ‘quo sira lo torn de las sauvatginas, de las bestias, d’estre a l’onor dins son Bestiari lemosin , bestiari navegant entre realitat e mitologia. Dins las annadas 1970 la Marcela fai doas rencontras importantas, ‘quelas dau Micheu Chapduelh e dau Jan dau Melhau. ‘La participara regularament a lor revista Lo leberaubre (per balhar de las raiç au leberon e far corre l’aubre la nuech). Delpastre comencet d’estre coneguda (mai que son òbra segurament) daus Lemosins per sas intervencions e sas entrevistas dins la premsa locala (Limousin Magazine, La Montagne, l’Echo, le Populaire… ) e mai de tots los occitanistas gracia a las revistas Oc, Occitans, e subretot Connaissance des Pays d’Oc (per la pluma d’Ives Roqueta).

Dins sas darnieras annadas, la Marcela avia beucòp trabalhat coma son amic Jan dau Melhau per far tornar viure e surtir de la polsiera de las centenas de textes inedits. Sufrenta de la malaudia de Charcot, Marcela Delpastre moriguet lo 6 de belier (feurier) 1998 a sa ferma d'a Germont, ente era nascuda, ente era totjorn damorada e ente avia totjorn trabalhat. Jan dau Melhau, son legatari universau, contunha e ‘chaba d’editar tota l’òbra de Delpastre a las edicions Lo Chamin de Sent-Jaume. Los manuscrits de la poeta son conservats a la biblioteca municipala d’a Limòtges.

Poeta, contaira, romanciera mai etnològa, Marcela Delpastre es auei reconeguda coma fasent partida daus dietz escrivans occitans los mai importants dau segle XX (au costat de Joan Bodon, Bernat Manciet, Renat Nelli, Max Roqueta). Lo messatge de ‘quela femna, ela qu’a jamais quitat sa terra lemosina, s’espandis a l’universau e parla per tots los òmes, e ‘qu’es ‘quò que fai la fòrça e la beutat de son escritura.

[Modificar] Bibliografia

• 1956 : -quauquas novelas dins la revista Réalités secrètes (René Rougerie, Limòtges)
• 1957 : -cronicas dins Le Courrier du Centre
• 1963-1971 : -articles per la Société d’Ethnographie du Limousin et de la Marche (Limòtges)
• 1963-…. : -collaboracions a la revista Lemouzi (Tula)
• 1964 :-La lenga que tant me platz (Lemouzi, Tula)
• 1965 :-Lo Rossinhòu e l’Eglantina (Lemouzi, Tula)
• 1967 :-La vinha dins l’òrt (Escòla Jaufre Rudel)
• 1968 :-Lo Chamin de terra (Lemouzi, Tula)
• 1970 :-La Terre douce (revista Traces)
• 1970 :-Los Contes dau pueg Gerjant (Lemouzi n°33, Tula)
• 1974 :-Saumes pagans (I.E.O.-Novelum)
• 1974 :-Figuras d’en quauqu’un temps e Proverbis lemosins (Lemouzi n°50, Tula)
• 1975-1998 :-collaboracions a la revista Lo Leberaubre
• 1978 :-Lo conte de Vira-Boton (Lemouzi n°66, Tula)
• 1982 :-Setz-vos sortier? Sorcellerie et magie en Limousin (Lemouzi, Tula)
• 1983 :-Lo sang de las peiras (Lo Leberaubre)
• 1983 :-Poète et paysanne (revista Traces)
• 1985 :-Louanges pour la femme (revista Friches)
• 1987 :-Natanael jos lo figier (ed. Lo Chamin de Sent Jaume, Meuzac)
• 1988 :-L’òrt / Le jardin sous la lune (ed. Lo Chamin de Sent Jaume, Meuzac)
• 1988 :-Le paysan, l’arbre et la vigne (Lemouzi, Tula)
• 1989 :-Le passage / La trauchada (ed. Lo Chamin de Sent Jaume, Meuzac)
• 1990 :-L’Histoire dérisoire, Marguerite dans le miroir, La fille assise (Fédérop, Mussidan)
• 1991 :-Lo Cocotin de l’argfuelh / La Petite baie du houx (ed. Lo Chamin de Sent Jaume, Meuzac)
• 1993 :-Les chemins creux : une enfance limousine (Payot, Paris)
• 1993 :-L’automne sur la mer (Les Amis de la Poésie, Bergerac)
• 1994 :-Derrière les murs : les années de pension (Payot, Paris)
• 1994 :-Requiem pour un pendu (Les Amis de la Poésie, Bergerac)
• 1995 :-Proses pour l’après-midi (Payot, Paris)
• 1996 :-Las vias priondas de la memòria –tome 1 des Mémoires- (L’Ostal del Libre, Orlhac)
• 1997 :-Paraulas per questa terra -5 volumes- (ed. Lo Chamin de Sent Jaume, Meuzac)
• 1997 :-Cinq heures du soir –Proses pour l’après-midi, tome 2- (Payot, Paris)
• 1998 :-Le jeu de patience (Payot, Paris)
• 1998 :-Les chemins creux (« Pocket » Presses de la Cité)
• 1999 :-Saumes pagans (ed. Lo Chamin de Sent Jaume, Meuzac)
• 1999 :-Poèmes dramatiques -3 volumes- (ed. Lo Chamin de Sent Jaume, Meuzac)
• 2000 :-Le bourgeois et le paysan, les contes du feu (Payot, Paris)
• 2000 :-Poésie modale -3 volumes- (ed. Lo Chamin de Sent Jaume, Meuzac)
• 2001 :-Le testament de l’eau douce (Fédérop, Gardonne)
• 2001 :-Les petits recueils (ed. Lo Chamin de Sent Jaume, Meuzac)
• 2001 :-D’una lenga l’autra (ed. Lo Chamin de Sent Jaume, Meuzac)
• 2001 :-Ballades (ed. Lo Chamin de Sent Jaume, Meuzac)
• 2002 :-Le chasseur d’ombres : et autres psaumes /1960-1969 (ed. Lo Chamin de Sent Jaume, Meuzac)
• 2002 :-L’araignée et la rose : et autres psaumes /1969-1986 (ed. Lo Chamin de Sent Jaume, Meuzac)
• 2003 :-Bestiari lemosin (ed. Lo Chamin de Sent Jaume, Meuzac)
• 2004 :-Mémoires –edicion integrala- (ed. Lo Chamin de Sent Jaume, Meuzac)
• 2005 :-Des trois passages en Limousin (ed. Lo Chamin de Sent Jaume, Meuzac)