Tory
From Wikipedia
Tory (Mehrtall tories) is een Utdruck för de Liddmaten vun de Konservative Partei in Grootbritannien.
Dat Woort is to'n eersten Mal in de Tiet vun König Charles II. bruukt wurrn. Dormals weer dat een Schimpwoort ut de Irische Spraak Gäälsch. Dor heet dat tóraighe. Dat bedutt irisch Rebellen.
De Tories weeren in dat 17. un 18. Jahrhunnert de, de glöben döen, dat de Königen up de Eer vun Gott insett wurrn sünd un dat se jem ehren Thron verarben könnt an jem ehre Kinner.
De Tories hören to de Tiet to de Lüde, de jümmers al Land un Geld harrt hefft. De enen weeren up de Siet vun de anglikaansche Karken gegen de Dissenters un gegen de Kathoolschen, de annern muchen dat lever, wenn jedereen sien Globen hebben dröff. All öbereen weeren de Tories dormals nich. De Lüde, de dat mit Charles II. holen döen, as England een Republik weer un he noch in't Exil in Frankriek seet, weeren Tories. Se streden dorför, datt de Stuarts wedder up den Thron kemen. Dat Gegendeel vun de Tories weeren de Whigs.
