Johann Balhorn
From Wikipedia
Johann Balhorn de Jüngere (* üm 1550; † üm 1604) weer en Bookdrucker ut Lübeck. Sien Naam warrt hüüt as Personifikatschoon för Ännern ansehn, de den Sinn entstellt.
Balhorn harr de Druckwarksteed vun sien Vader Johann Balhorn den Öllern övernahmen. Över 200 Drucksaken sünd ut de balhornsche Druckeree nableven. Dorto höört Kinnerfibeln, Schriften to de Reformatschoon, Volksliteratur un annere Böker.
1586 keem siene Utgaav vun dat Lübsche Recht rut, mit de Angaav Auffs Newe vbersehen, Corrigiret. In vele Punkten wiek de Utgaav vun öllere af un mehrsttiets to’n Nadeel vun de Börger. Dat föhr denn ok to männigeen Prozess. Dorför hebbt de Lüüd verbetert dör Johann Balhorn (oder Jan Balhorn) to’n Schimpwoort maakt. Doch he weer woll gornich verantwoortlich för de Ännern. Twee Lübsche Raatslüüd un Juristen hebbt dat allens schreven. He weer blots de Dumme, de denn ahn Böset to ahnen sien Naam vörn rop sett hett.
Bi Johann Peter de Memel in Lustige Gesellschaft (Lübeck 1656) kaamt sien Naam dat eerste Maal in de Literatur vör. Later, as de Snack vun verbetert dör Johann Balhorn sik inbörgert harr un al nüms mehr wüss, worüm, dor hett sik de Geschicht dörsett, dat he in ene Kinnerfibel kenen Hahn mit Sporen rinsett harr, so wie de Lüüd dat wennt weren, un dat bi em de Hahn kene Sporen harr, de harr Eier ünner sik leggen. Un dor stünn denn verbetert dör Johann Balhorn ünner. Karl Friedrich Wilhelm Wander hett denn aver in’t 19. Johrhunnert rutfunnen, dat dat Rechtsbook de würkliche Grund för sienen slechten Roop weer.
