Gyanendra van Nepal
Van Wikipedia
- Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.
Gyanendra Bir Bikram Shah Dev (7 juli 1947) is sins 4 juni 2001 de zittende keuning vaan 't Himalayastäötsje Nepal.
Gyanendra is de twiede zoon vaan Mahendra en 't jónger broor vaan Birenda. In 1950 waor de toenmaolege keuning Tribhuvan (grampeer vaan Gyanendra) en 't groetste deil vaan de familie in exiel in India, en in november vaan dat jaor woort de dreijäörege Gyanendra al tot keuning oetgerope; heer bleef in "functie" tot januari 1951, wie d'n awwe keuning trökkaom. Later studeerde Gyanendra in Cambridge, in Darjeeling (India) en aon de Nepalese Birendra-universiteit.
In 2001 voont in 't Nepalees keuninklik paleis e keuningsdrama plaots boebij kroenprins Dipendra keuning Birendra en de meiste lejer vaan de keuninklike familie vermaordde um teslotte ouch zelfmaord te plege. Gyanendra waor neet presint bij dit bloodbaad en woort tot opvolger vaan Birenda gekroend. Es keuning begós heer bekaans direk mèt 'n otoritair bewind: de democratische hervörminge ingestèld door ziene veurgenger, wie de instèlling vaan de constitutioneel monarchie in 1990. Heer oontsloog tot twie kier premier Sher Bahadur Deuba en oontboond ouch 't parlemint. In aprèl 2006 kaom 't tot oetgebreide proteste in de hoofstad Kathmandu, die de keuning mèt geweld perbeerde neer te sloon. Oetindelik zag 'r op 24 aprèl touw de democratie te zalle herstèlle.
Gyanendra is getrojd mèt keuningin Komal, zöster vaan de vermaorde keuningin Aishwarya. Ze höbbe twie kinder: kroenprins Paras en prinses Prerana. Gyanendra steit bekind es poëzieleefhöbber en werp ziech gere op es natuurbesjèrmer.
