Bombay
Van Wikipedia
- Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.
Bombay (sins 1995 officieel Mumbai) is de houfstad vaan Maharashtra, India, en de groetste stad vaan dat laand (17 miljoen einwoeners in 2005). Daomèt is de stad ein vaan de groetste stei op de wereld. De conurbatie is zelfs groeter es die vaan Tokio en daomèt 't groetste urbaan gebeed op de gaanse Eerd.
[bewirk] Stadsfuncties
Bombay ligk aon de Indische Oceaan en is de groetste ziehave vaan Wes-India. Veur 't personeverveur is 't zelf d'n ierste have. Bombay is ouch commercieel cintrum vaan India: de effektebeurs en de reservebank vaan 't land zien hei gevesteg. In Bombay zit ouch 't cintrum vaan de (bleujende en immense) Indiase filmindustrie: Bollywood. Wijers ligk binne de grenze 't Borivali national Park, wat wel 't eineg Nationaal Park op Eerd is tot in e metropool ligk.
[bewirk] Historie
Al sins de steintied moot 't gebeed boe noe Bombay ligk bewoend zien. De stad waor vaanaof de derde ieuw veur Christus deil vaan 't riek vaan Asjoka; later veel 't oonder de Silhara-dynastie en oonder Gujarat. Oet de late Middelieuwe stamme de ajdste gebawwe die noe nog stoon. De naom beteikent Mojer Mumba, nao de Hindoe-gaodin Mumbadevi.
In 1534 vereuverde Portugal de plaots. In 1661 kaom heer in Ingelse han; aonvenkelik aon de keuning perseunlik, laoter aon de Ingelse Oosindische Compagnie. In deen tied steeg 't aontal einwoeners enorm: vaan 10.000 nao 60.000 in vieftien jaor.
Tösse 1817 en 1845 woort de stad oonderworpe aon 'n ingriepend inzjenieursprojek, boebij de zeve eilen tot ei stök vastelaand gemaak woorte. Wie in 1869 't Suezkenaal geëupend woort kraog de stad ineins touwgang tot de haves aon de Middellandse zie en greujde ze nog sneller, tot ein miljoen in 1906. Later woort 't 't brandpunt vaan de Indiase independentiebeweging oonder Mahatma Ghandi. In 1960 woort ze tot houfstad vaan Maharashtra. Sins 1986 is de stad groeter es Calcutta en daomèt nómmer ein in India. In 1992 braoke relle tösse Hindoes en moslims oet.
