ზაქარიაძე, სერგო

ვიკიპედიიდან

სერგო ზაქარიაძე

სერგო ალექსანდრეს ძე ზაქარიაძე(* 18 ივნისი/1 ივლისი, 1909, ბაქო ― † 13 აპრილი, 1971, თბილისი), საბჭოთა ეპოქის ქართველი მსახიობი, ყოფილი სსრკ-ის სახალხო არტისტი (1958).

[რედაქტირება] ბიოგრაფია

სწავლობდა თბილისის სახელმწიფო უნივერსიტეტის ფილოლოგიის ფაკულტეტზე. 1926 წელს მუშაობა დაიწყო რუსთაველის სახელობის თეატრში, 1928-დან იყო კ. მარჯანიშვილის მიერ ქუთაისში დაარსებული თეატრის (შემდეგ მარჯანიშვილის სახელობის თეატრი) მსახიობი, 1956 წელს გადავიდა რუსთაველის სახელობის თეატრში.

[რედაქტირება] შემოქმედება

ზაქარიაძის შემოქმედებაში ერთმანეთს ერწყმოდა ღრმა ინტელექტუალიზმი, გაბედულება, ჩანაფიქრის ხორცშესხმისას აზრის სიცხადე და ემოციურობა, უკიდურესი სიზუსტე და სულიერი სითბო. იგი სცენური ხასიათების ფსიქოლოგიური დამუშავების ოსტატი იყო - დიდი გამომსახველობის მქონე დეტალებით, მსუყე, კონტრასტული საღებავებით, ფაქიზი ფსიქოლოგიური ნიუანსებით ძერწავდა სახეს.

ზაქარიაძის გმირთა ბუნებაში ვაჟკაცობა და ნებისყოფა ეხამებოდა ლირიზმს, სილბოს. მსახიობი თამაშობდა გმირულ, სახასიათო და კომიკურ როლებს. მარჯანიშვილის სახელობის თეატრის სცენაზე შექმნილი როლებიდან აღსანიშნავია: რევოლუციონერი დომენრი ( დადიანის "ნაპერწკლიდან", 1937), ჯიბილო ( კაკაბაძის "კოლმეურნის ქორწინება", 1945), გიგაური ( მოსაშვილის "მისი ვარსკვლავი", ყოფილი სსრკ-ის სახელმწიფო პრემია, 1952), გიორგი ( თაბუკაშვილის "რაიკომის მდივანი", 1954). რომანტიკული ელფერით გამოირჩეოდა ზაქარიაძის მიერ შესრულებული როლები ბაგრატიონისა (სამსონიას "ბაგრატიონი", 1944), ბახასი ( ვაჟა-ფშაველას "მოკვეთილი", 1945), მეფე დავითისა ( გოთუას "დავით აღმაშენებელი", 1946), ბესიკ გაბაშვილისა ( გოთუას "მეფე ერეკლე", 1942).

უარყოფით როლებს ზაქარიაძე ასრულებდა მგზნებარე მამხილებელი პათოსით, იგი დაუნდობლად ხდიდა ფარდას ადამიანურ მანკიერებებსა და ცხოვრების მახინჯ მოვლენებს. განსაკუთრებით დასამახსოვრებელია ამ მხრივ თინიბეგი მრევლიშვილის "ზვავში" (1956). მახვილი კომედიური ნიუანსებით ძერწავდა მსახიობი სახასიათო როლებს (კავალერი რიპაფრატა, გოლდონის "სასტუმროს დიასახლისი", 1952).

შემოქმედებითი აზრის სიმწიფე, რომანტიკული მგზნებარება ახასიათებდა ზაქარიაძის მიერ რუსთაველის სახელობის თეატრის სცენაზე შესრულებულ როლებს:ქადაგი ("ბახტრიონი", ვაჟა-ფშაველას მიხედვით, 1960), ფიროსმანი ( ნახუცრიშვილის "ფიროსმანი", 1961). ნატიფი ფსიქოლოგიური ნიუანსებით, მრელვარე თანაგრძნობით დახატა ზაქარიაძემ ოიდიპოს მეფის სახე ( სოფოკლეს "ოიდიპოს მეფე", 1956), რომელშიც ადამიანის სულიერი სილამაზის, მისი გონების სიდიადის მაღალი რწმენა ჩააქსოვა, სატირული სიმძაფრით იყო აღჭურვილი მისი შუისკი ( პუშკინის "ბორის გოდუნოვი", 1957).

1934 წლიდან მოღვაწეობდა კინოში. შეასრულა როლები: თორღვაი ("უკანასკნელი ჯვაროსნები", 1934), შადიმან ბარათაშვილი ("გიორგი სააკაძე", 1942-1943, სსრკ-ის სახელმწიფო პრემია), ფოსტალიონი გიორგი ("დღე უკანასკნელი, დღე პირველი", 1960), ხოლო 1965 წელს გიორგი მახარაშვილის როლის შესრულებით ("ჯარისკაცის მამა", 1965, ლენინური პრემია, 1966) ზაქარიაძემ საქვეყნოდ გაუთქვა სახელი ქართულ კინოს. ზაქარიაძე 1955-1960 წლებში სცენურ მეტყველებას ასწავლიდა თბილისის თეატრალურ ინსტიტუტში.

რუსთაველის სახელობის პრემია (1971). დაჯილდოებულია ლენინის ორდენით, შრომის წითელი დროშის და "საპატიო ნიშნის" ორდენებით.

Retrieved from "http://ka.wikipedia.org../../../%E1%83%96/%E1%83%90/%E1%83%A5/%E1%83%96%E1%83%90%E1%83%A5%E1%83%90%E1%83%A0%E1%83%98%E1%83%90%E1%83%AB%E1%83%94%2C_%E1%83%A1%E1%83%94%E1%83%A0%E1%83%92%E1%83%9D.html"

კატეგორიები: ქართველები | ქართველი მსახიობები | დაბადებული 1909 | გარდაცვლილი 1971