Porkkala Sovieta
From Wikipedia
Porkkala esas rurala areo apud Helsinki, 50 kilometri weste. Pos la duesma mondo-milito ol esis lugita da Soviet-Uniono por esar garnizono defensanta Leningrad. Per Porkkala-areo e Naissaari en Estonia Soviet-Uniono blokusis la navigo a Leningrad en Finlandala bayo di Baltika Maro. Per kanoni esis posibla atingar anke Helsinki, la chef-urbo.
Ye 19 di septembro 1944 Finlando e Soviet-Uniono subskribis l'armistico. Segun la traktato Finlando donis Porkkala a Soviet-Uniono por 50 yari. Soviet-Uniono pagis 5.000.000 marki en yaro.
L'areo esis 380 km2. Ol kontenis Kirkkonummi, Degerby, Siuntio, Inkoo, parto di Espoo, e la peninsulo di Porkkala. Sovietani konstruktis en Mäkiluoto la militala bazo, en Kirkkonummi la stabo, en Friggesby l'aeroportuo, en Upinniemi la militala portuo, en Båtvik la komercala portuo, la bazala skolo e la kliniko. Anke la fervoyo de Helsinki til Turku venis tra l'areo. Pos 1947 la treno povis vehar tra l'areo – ma nur la fenestri parkovrita.
Entote 7.272 Porkkalaani esis evakuita. La maxim granda nombro di Sovietani en Porkkala esis 40.000 (30.000 militani, 10.000 civili). Por la Sovietani la cirkonstanco esis plu bona kam en Soviet-Uniono, qua esis devastita pro la milito.
En 1950a yari la bazo divenis anciena-tempa. La baricentro dil kolda milito esis en centrala Europa, ma altralatere la morto di Yosif Stalin e la liberigo di Austria igis la relati inter superpovi plu amikala. Ye 17 di septembro 1955 prezidanto Urho Kekkonen e chef-ministro Nikolai Bulganin kontratis en Moskva, ke Porkkala retrodonos a Finlando plu antee kam la originala kontrato dicis. Samatempe la kontrato di la Amikeso, Koopero e reciproka Helpo inter la stati esis prolongita.
Ye 26 di januaro 1956 la frontierala stango esis elevita lastafoye. Nun (pos 50 yari) nur kelka traiti rakontas pri la sovieta tempo en Porkkala.
