Cellula (biologia)
De Wikipedia, le encyclopedia libere
Le cellula (latino: parve camera) es le unitate structural e functional que constitue tote o parte de un esser vivente. Le theoria cellular implica le unitate de tote le vivente: tote le esseres vivente son componite de cellulas, cuje structura fundamental es commun, como anque le homeostase de un medio interior que es stabile e propitie al disveloppamento del cellulas.
[modificar] Constitution de un cellula
Tote le cellulas contine certe compositos fundamental commun:
- le ADN, le information genetic que contine le information pro construer le altere compositos,
- le proteinas, enzymatic o constitutive.
- le membranas cytoplasmic, que isola le cellula de su ambiente, e que age como un filtro o un systema de communication con le exterior, e compartimenta le cellulas le plus complexe. Illos delimita le medio interior.
Le cellulas anque ha certe capacitates de commun:
- le reproduction cellular, per division de la cellula, appellate mitose.
- le metabolismo cellular, que utilisa material brute pro convertir energia a in energia cellular (gradientes ionic, ATP), ab le elementos del digestion o ab le energia solar pro le cellulas vegetal, pro producer compositos del cellula, e que rejecta productos derivate.
- le synthese de proteinas, per le transcription de ADN a in ARN pois per le traduction per le ribosomas de ARN a in proteina.
On estima que il ha 50 000 milliardos de cellulas in le corpore human, subdivise in 220 typos differente, proprie al mesme numero de texitos. In effecto, cata typo de cellula es proprie al texito del qual il face parte. Iste parentato es indicate per le proteinas que coperi le cellula.
Il existe duo typos fundamental de cellulas, secundo que illos possede o non possede un nucleo:
- le procaryotos, del qual le ADN es libere in le cytoplasma (le bacterios, per exemplo). Le procaryotos son de cellulas plus primitive, que appareva primo in le curso del evolution. Iste gruppo es subdivise in duo alteres: le del eubacterios e le del archeobacterios.
- le eucaryotos del qual le nucleo es circumferite per un membrana nuclear.
| Procaryotos | Eucaryotos | |
| Organismos typic | bacterios | protistas, fungos, plantas, animales |
| Talia typic | ~ 1-10 µm | ~ 10-100 µm |
| Typo de nucleo | nucleoide; nulle nucleo ver | nucleo ver con membrana duple |
| ADN | circular | moleculas linear (chromosomas) con proteinas histona |
| ARN/synthese de proteinas | copulate al cytoplasma | synthese de ARN in le nucleo synthese de proteinas in le cytoplasma |
| Ribosomas | 23S+16S+5S | 28S+18S+5,8S+5S |
| Structura cytoplasmatic | multo pauc structuras | multo structurate per membranas intracellular e un cytoskeleto |
| Movimento del cellula | flagello facite de flagellina | flagello et cilios facite de tubulina |
| Metabolismo | anaerobic ou aerobic | generalmente aerobic |
| Mitochondrios | nulle | de un a plure dozenas |
| Chloroplastos | nulle | in le algas e le plantas |
| Organisation | generalmente de cellulas isolate | cellulas isolate, colonias, organismos evoluite con cellulas specialisate |
| Division del cellula | division simple | Mitose (replication del cellula) Meiose (formation de gametas) |
[modificar] Le structura procaryote
- Le cytoplasma del procaryotos (le liquido que forma le major parte del volumine del cellula) es diffuse e granular, del facto del ribosomas (loco de synthese de proteinas).
- Le membrana plasmic (duo stratos de lipides) isola le interior del cellula de su ambiente, e servi como filtro e como porta de communication.
- Il ha sovente un pariete cellular. Illo es formate de peptidoglycano in le eubacterios, e joca le rolo de barriera supplementari contra le fortias exterior. Illo anque impedi le collapso del cellula sub le pression osmotic in un ambiente hypotonic.
- Le ADN del procaryotos es componite de un molecula circulari superinrolate. Ben que sin un ver nucleo, le ADN es totevia condensate in un nucleoide.
Procaryotos pote posseder un ADN extra-chromosomal, organisate in moleculas circulari appellate plasmidos. Illos pote haber functiones supplementari, como le resistentia al antibioticos.
- Certe procaryotos ha un flagello que los permitte de se displaciar activemente, plus tosto que ir al deriva passivemente.
[modificar] Le structura eucaryote
- Le cytoplasma del eucaryotos non es si granular como le del procaryotos, post que un major parte de su ribosomas son reattaccate al reticulo endoplasmic.
- Le membrana plasmic resimila, in su function, a le del procaryotos, con qualque differentias minor in su configuration.
- Le pariete cellulosic, quando illo existe (in vegetales), es componite de polysaccharidos, principalmente cellulosa.
- Le ADN del eucaryotos es organisate in un o plure moleculas linear, multo condensate, inrolate circum histonas. Tote le chromosomas del ADN son stockate in le nucleo, separate del cytoplasma per un membrana. Le eucaryotos non possede plasmidos: solmente qualque organulos pote contenir ADN.
- Certe cellulas eucaryote pote devenir mobile, utilisante un cilio o un flagello (spermatozoide per exemplo). Lor flagello es plus evoluite que le del procaryotos.
Cellulas eucaryote contine plure organulos que ha functiones specific. Iste organulos son separate le uno del altero, como anque del cytoplasma, per membranas.
- Le reticulo endoplasmic (RE) es un extension del membrana del nucleo. Illo es divise in RE lisie e RE rugose (granulose), in function de su apparentia al microscopio. Le superficie del RE rugose es coperite per ribosomas que insere le proteinas neosyntetisate in le RE. Ab le RE, le proteinas son transportate verso le apparato de Golgi.
- Le apparato de Golgi es le loco de transformation final de proteinas. Le glycolysation (addition de catenas glucidic complexe) es realisate a iste nivello.
- Le mitochondrios joca un rolo importante in le metabolismo del cellula. Illos contine lor proprie parve parte de ADN (ADN mitochondrial).
- Le cytoskeleto permitte al cellula a conservar su forma (tensegritate) e a se mover. Illo es anque importante durante le division del cellula, e in le systema de transporto intercellular.
- Le chloroplastos son presente in le plantas e le algas (organismos photosynthetic). Illos converti le energia luminose del sole in energia chimic utilisate pro fabricar sucros ab le dioxydo de carbon (phase tenebrose (sombre) del photosynthese). Illos contine anque ADN. Illos son derivate de cyanobacterios que deveniva symbiotic.
Eucaryotos pote formar colonias multicellular. Iste colonias consiste sia in gruppos de cellulas identic, capabile de restar in vita durante separation del colonia principal (per exemplo, fungos), sia in gruppos de cellulas specialisate interdependente. Iste secunde typo forma le organismos le plus evoluite, como le plantas e le animales.
| 1. Nucleolo |  |
| 2. Nucleo | |
| 3. Ribosoma | |
| 4. Vesicula | |
| 5. Reticulo endoplasmic granulose (rugose) | |
| 6. Apparato de Golgi | |
| 7. Microtubulo | |
| 8. Reticulo endoplasmic lisie | |
| 9. Mitochondrio | |
| 10. Vacuolo | |
| 11. Cytoplasma | |
| 12. Lysosoma | |
| 13. Centriolo |
