Kito Fryco Stempel
Z Wikipedije
Kito Fryco Stempel narodźi so 29. nowembra 1787 w Parcowje. Wot 1802-1807 wopyta gymnazij w Budyšinje, hdźež zezna so tež z Bjedrichom Wylemom Mičku. W lětach 1807-1810 studowaše teologiju na lipšćanskej uniwersiće. Hnydom w prěnim studijnym lěće załoži sobu t. mj. Korps Lusatia. 1809 zastupi do Serbskeho prědarskeho towarstwa, předchadneho zjednoćenstwa dźensnišeje Sorabije Lipsk.
W lětach 1810-1813 bě domjacy wučer, prjedy hač jeho 1813 za fararja w Malinje njepowołachu. W tutej wosadźe skutkowaše dźesać lět, doniž njesta so 1823 wyši farar w Lubnjowje. Wobšěrnu wosadu zastarowaše někotre lětdźesatki, prjedy hač njepoda so 1863 na wuměnk. Po nim so hižo serbski farar w Lubnjowje njepřistaji, štož rozsudnje spěšnišej asimilaciji wosady polěkowaše.
Stempel zemrě 2. februara 1867 w Lubnjowje.
W běhu mnohich lět duchowneho skutkowanja za swojich wosadnych, napisa Stempel tež cyły rjad originalnych basni, mj. dr. epos "Te tśi rychłe tšubały" - najdlěša serbska baseń scyła. W njezwučenym sylabiskim systemje komponowany epos płaćeše na 80 lět jako zhubjeny. Ota Wićaz jón 1950 zaso namaka. Rudolf Jenč přistupni jón zjawnosći w seriji Pomniki serbskeho pismowstwa jako diplomatiske wudaće. Dalši epos, "Pytanje za starym mjasecom abo łužyskich Serbow potłocenje" njeje so bohužel hižo namakał a płaći dale jako zhubjeny.
Nimo swojeho basnjenja wustupowaše Stempel tež jako přełožowar antikskich basnikow. To nastupa wosebje Fedrusowe fabule (z łaćiny) a Theokritowe idyle.
[wobdźěłać] Literatura
Stempel, K. Fr., Te tśi rychłe tšubały a druge pěsni. Zezběrał, za śišć pśigotował a zawod napisał Rudolf Jenč (= Pomniki serbskeho pismowstwa čo. 1). Budyšin, 1963 [diplomatiske wudaśe].
Stempel, K. Fr., Theokritowe pastyrske pěsni. Phaedrusowe fable. Za śišć pśigótował, pśedgrono a komentar napisał Rudolf Jenč (= Pomniki serbskeho pismowstwa čo. 4). Budyšin, 1963.
Kaufürst, F., Studije k rěcy Kita Fryca Stempla, Budyšin, 2005.
Kategorije: Serb | Spisowaćel | Duchowny | Rodź. 1787 | Zemr. 1867
