Zodíaco
Na Galipedia, a wikipedia en galego.
O Zodíaco é unha banda de ceo por onde, aparentemente, transitan o Sol e os planetas. Durante o século V adC, dita rexión foi dividida en 12 partes iguais (unha por cada mes do ano) ás cales deron o nome da constelación máis próxima (grupos que moi ben poderían existir antes da invención do Zodíaco propiamente). Estas constelacións foron as seguintes. Ofrécense, primeiramente, os seus nomes en latín, que son os que se usan comunmente. Cando tamén son coñecidas polos seus nomes correspondentes en galego, estes son sinalados entre paréntese.
- Aries, o carneiro, primeira constelación do Zodíaco, que comeza os seus días o 21 de marzo, o primeiro día do ano de moitos dos calendarios antigos
- Taurus (Tauro), o touro
- Gemini (Xémini), os xemelgos
- Cancer (Cáncer), o cangrexo
- Leo, o león
- Virgo, a virxe
- Libra, a balanza
- Scorpius (Escorpio), o escorpión
- Sagittarius (Saxitario), o arqueiro
- Capricornus (Capricornio), a cabra de mar
- Aquarius (Acuario), o augador ou portador de auga
- Pisces (Piscis), os peixes
As constelacións desta lista son consideradas as máis antigas, tendo unha importancia evidente na astroloxía (disciplina que antigamente se confundía coa astronomía). Hai que sinalar que, a esa lista de 12 constelacións, engadiuse, modernamente, unha décimo terceira: Ophiuchus, o serpentario. Actualmente, e astronomicamente falando, o Sol transita polos seus límites, segundo a UAI, do 30 de novembro ao 17 de decembro. Os antigos probablemente non tomaron isto en consideración (ou non o revelaron) por razóns estéticas ou astrolóxicas, ou simplemente para os creadores do primeiro Zodíaco non existía.
 Aries |
 Taurus |
 Gemini |
 Cancer |
 Leo |
 Virgo |
 Libra |
 Scorpio |
 Sagittarius |
 Capricornio |
 Aquarius |
 Pisces |
