Diarmaid Ó Donnabháin Rossa
Ón Vicipéid, an chiclipéid shaor.
Ba as Iarthar Chorcaí dó Dhiarmaid Ó Donnabháin Rossa (nó Jeremiah O'Donovan Rossa as Béarla). 1831-1915.
Ba é a bhunaigh an Phoenix Society, gluaiseacht cheannairceach Éireannach (1858) as ar fhás Bráithreachas na Poblachta níos déanaí. Cuireadh i bpríosún é go minic mar gheall ar an mbaint a bhí aige le gluaiseacht na bhFiníní, agus díbríodh as Éirinn é faoi dheireadh in 1871.
Chuir sé faoi i Nua-Eabhroc agus ba é a d'eagraigh na feachtais bhuamála i gcoinne chathracha Shasana a mhair ar feadh roinnt blianta. Rinne rialtas na Breataine iarracht é a eiseachadadh ach níor éirigh leo. Lámhach bean Shasanach, Yseult Dudley, é in 1885 lasmuigh dá oifig in aice le Broadway, ach tháinig sé slán. Chreid a lucht leanúna gur ar ordú ó Rialtas na Breataine a rinne sí an t-ionsaí seo.
Tugadh cead do Ó Donnabháin filleadh ar Éirinn i 1894, agus aris i 1904. Rinne "Saoránach" de chathair Chorcaí de i 1904, rud a léirigh go raibh tacaíocht mhór aice ina cheantar dúchais. D'fhill sé ar Mheiriceá agus bhí sé an-tinn sna blianta deireanacha dá shaol. D'éag sé in ospidéal in Oileán Staten ar an 22 Meitheamh 1915.
Ba mhór an tábhacht shiombalach a bhain lena thórramh. Tugadh a chorp ar ais go hÉirinn agus cuireadh é i nGlas Naíon. Bhí Éirí Amach na Cásca á bheartú ag an am agus d'úsáid Bráithreachas na Poblachta an ócáid chun an náisiúnachas a ghríosadh sa phobal. Ba é Pádraig Mac Piarais a thug an óráid os cionn uaighe, ceann de na hóráidí ba cháiliúla i stair na hÉireann.
