Stone Roses

Diwar Wikipedia, an holloueziadur digor

The Stone Roses a zo ur strollad saoz berrbad a-walc'h, en deus graet reuz e dibenn ar bleadou 80 ha penn kentañ ar bleadoù 90. E penn luskad sonerel Manchester e oa ar strollad-mañ, àr un dro get the Happy Mondays. Lâret e vez o deus diazezet pezh vez graet "Britpop" (diwezhatoc'h e vo kendalc'het get strolladoù èl Radiohead, Blur, Oasis - savet ar c'hoant da sevel ur strollad rock get Liam Gallagher goude en devoud gwelet ar Stones Roses àr al leurenn e 1988, ha loc'het gete-). Trevezet eo bet emzalc'h Ian Brown àr ar leurenn get meur a ganer da c'houde.

Taolenn 1 Prantadoù kentañ ar strollad : 2 Un eil album... a-benn ar fin ! 3 Izili ar strollad é valafenniñ, adsavet 'vo ar strollad... pe ne vo ket ? 4 Piv a oa er strollad ? 5 Pladennoù : 6 Lec'hiennoù Internet :

[kemmañ] Prantadoù kentañ ar strollad :

E penn kentañ ar bleadoù 80 e oa bet savet framm ar strollad get Ian Brown (kan), John Squire (gitar), Gary Mounfield -"Mani"- (gitar boud) hag Alan Wren -"Reni"- (taboulinoù) e Manchester da heul taolioù arnod ("The Patrol" ha strolladoù arall gete). Tud arall a voe e-barzh ar strollad evel Andy Couzens ha Pete Garner, bras o levezon met n'int ket chomet èl izili wirion er strollad.

Setu savet gete un album e 1989, goude o devout enrollet 5 pladenn vihan (singles). Ur bennoberenn sur ha n'eo ket marteze. Kudennoù gwirioù o doa bet er mareoù-se avat, get o zi-embann peurgetket. Sonadegoù brudet a rezont ('Ally Pally' gig e North London's Alexandra Palace d'ar 25 a viz Kala-gouiañv 1989 hag unan e Spike Island e-kreiz ar ster Mersey d'ar 27 a viz Mae 1990).

[kemmañ] Un eil album... a-benn ar fin !

Torret gete o skrid-emglev get Silverstone hag engouestlet da heul get Geffen Records, setu a-benn ar fin the Stones Roses da lakaat un eil pladenn da voned er-maez e dibenn 1994, "Second Coming" hec'h añv, blaz an heavy metal (hag eil prantad Led Zeppelin èl "Physical Graffiti") àr ar bladenn-se, levezonet get gitar John Squire. Kerse a ziwanas diàr ar bladenn-mañ, pa voe gortozet get karourion ar strollad e-pad 5 blead àr-lerc'h e benn-oberenn gentañ, ha broket kement arall àr he divoud.

Àr ziskar eh eas ar strollad pand eas kuit Reni, ha d'e heul, John Squire e-unan a skarzhas kuit d'an 1^añ a viz Imbrel 1996 (ha ne oa ket ur pesk Imbrel !). Kenderc'hel a reas Ian Brown ha Mani get ar strollad tamm pe damm e-pad ur blead met freuzet e voe gete da heul un abadenn druezus a-walc'h e-kerzh festival Reading.

[kemmañ] Izili ar strollad é valafenniñ, adsavet 'vo ar strollad... pe ne vo ket ?

Ur strollad nevez a voe savet get John Squire : the Seahorses. Ur bladenn hag achu gete ivez. Da c'houde e voe e bladenn solo gentañ get Squire e 2002, "Time Changes Everything", hag unan arall e 2004 : "Marshall's House". Moned a ra Mani da seniñ gitar-boud e-barzh Primal Scream.

Evit pezh a sell doc'h Ian Brown, peder fladenn solo a savas, berzhig a-walc'h a voe graet gete, ha klevet eo bet e-barzh sonadegoù bras pe festivalioù dre vro-Saoz. Ur strollad nevez a voe savet get Reni ivez, e 1999 : the Rub. Sonet en deus e korn-bro Manchester d'ar mare-se, ne ouier ket petra eo daet the Rub da vout, met un album solo zo bet graet get Reni e 2004 avat, unan dedennus a-walc'h diàr pozioù John Squire...

E miz Eost 2004, e-kerzh sonadegoù e Belfast ha Surrey e voe gwall souezhet an arvestourion get Ian Brown, hemañ a sonas dreist-holl sonennoù brudet prantad kentañ ar Stones Roses. Ha kenderc'hel a reas e-giz-se diwezhatoc'h, é seniñ àr un dro tonioù kozh ha tonioù nevez dezhañ e-unan, ha Mani a zeuas àr ar leurenn getoñ, ar wezh kentañ a-c'houde 8 vle ! Noel Gallagher (gitarour Oasis) a voe é seniñ getoñ ivez, er sonenn "Keep What Ya Got" (single). A-hend arall, Ian Brown ha Mani a voe klevet en un ton single ("Reign") get DJ James Lavelle hag e strollad UNKLE, ha tapet 40^vet plas get ar single-mañ.

E miz Mae 2005 e voe klevet komz a-ziwoud adsevel ar strollad en-dro, diàr pozioù Squire e-unan e-barzh ur gazetenn bennaket. Gwelet e voe a-stroll get Mani ha Reni en ur sonadeg bennak, peadra da vouetaat ar safar a-ziwoud adsavidigezh ar strollad. Reni en deus savet sonennoù ha c'hoant en deus d'o seniñ get Mani, daoust hag e vo graet un dra bennak get ar labourioù-mañ en ur raktres get the Stone Roses, n'eo ket sur pa ouier e veze aozet rac'h ar sonennoù get Ian Brown pe John Squire e-raok ?

[kemmañ] Piv a oa er strollad ?

Izili diazez (adalek Miz Kala-Gouiañv 1987 betek Miz Meurzh 1995) :

   * Ian Brown, Kaner kentañ
   * John Squire, gitar ha mouezhioù a-dreñv, diskan
   * Mani (Gary Mounfield), gitar boud
   * Reni (Alan Wren), taboulinoù, diskan

Ha re 'rall :

   * Andy Couzens, gitarour. Aet eo kuit ag ar strollad e Miz Gourhelen 1986 (savet The Hign getoñ da c'houde)
   * Pete Garner, gitar boud (etre Miz C'hwevrer 1984 hag Eost 1987)
   * Cressa, (Steve Cressa) graet 'vez anezhoñ "pempvet ezel ar strollad" a rae àr-dro kempennadur sonioù ar gitar(1989-1990)
   * Robbie Maddix, tabouliner, en doa kemeret lec'h Reni e miz Ebrel 1995
   * Nigel Ippison, é seniñ get an touchennaouegoù àr al leurenn goude miz Gourhelen 1995
   * Aziz Ibrahim, gitarour, en doa kemeret lec'h John Squire e miz Ebrel 1996.

[kemmañ] Pladennoù :

   * The Stone Roses (1989)
   * Second Coming (1994)

hag un nebeud dastumadegoù :

   * Turns Into Stone (1992)
   * The Complete Stone Roses (1995)
   * Garage Flower (1996)
   * Remixes (1996)
   * The Very Best of The Stone Roses (2002)

[kemmañ] Lec'hiennoù Internet :

   * http://www.thisisthedaybreak.co.uk
   * http://www.thestoneroses.co.uk